Мөрийтэй тоглоомчдоос авлига авсан эрүүгийн мөрдөгч ЦОЛОО НЭМҮҮЛЖЭЭ

- Гэрчийн мэдүүлэг бүхий хоёр хуудас баримт шалгалтын явцад алга болсон-

Цагдаагийн алба хаагчид хууль бус мөрийтэй тоглоом зохион байгуулагчдыг хуулийн хүрээнд хамгаалж, түүнийхээ хариуд сар бүрийн орлогоос нь тодорхой хэмжээний хувь авдаг гэх мэдээлэл бий.

Гэмт хэргээс урьдчилан сэргийлэх, таслан зогсоох чиг үүрэгтэй хууль сахиулагчид нь өөрсдөө баримт нотолгоотой хэргийг нуун далдалж, албан тушаалаа ашиглан удаа дараа авлига авсан үйлдэл олон нийтэд ил болсон ч хууль зөрчсөн алба хаагчдадаа арга хэмжээ авах нь бүү хэл цолыг нь нэмж, урамшуулсан тохиолдол гарлаа.

Тодруулбал, Эрүүгийн цагдаагийн албаны Кибер гэмт хэрэгтэй тэмцэх хэлтсийн мөрдөгч, ахлах дэслэгч Г.Тэмүүлэн мөрийтэй тоглоомчдоос сар бүр тогтмол онц их хэмжээний мөнгө бэлнээр авсан байж болзошгүй нөхцөл байдал тогтоогдсон.

Эрүүгийн хуулийн 20.17 дугаар зүйл буюу "мөрийтэй тоглоом зохион байгуулах" гэмт хэрэгтэй тэмцэх чиглэлээр зохион байгуулж буй шалгалтын явцад мөрдөгч Г.Тэмүүлэн нь хэргийн холбогдогчтой хамааралтай болохыг илрүүлсэн. Улмаар Цагдаагийн албаны дотоод хяналт, шалгалтын хүрээнд мөрдөн шалгах ажиллагаа үргэлжилж байгаа гэдэг мэдээллийг Цагдаагийн ерөнхий газраас өгч байв.

Гэтэл гэмт хэрэгт холбогдон шалгагдаж буй мөрдөгч, ахлах дэслэгч Г.Тэмүүлэнгийн цолыг өнгөрсөн долоо хоногт нэмж ахмад цол олгожээ.

Түүнийг Дотоод хяналт, аюулгүй байдлын албанаас шалгахдаа өнгөрсөн хугацаанд тайлбар мэдүүлэг аваагүй гэх бөгөөд гэрчийн мэдүүлэг бүхий хоёр хуудас баримт шалгалтын явцад алга болсон гэх эх сурвалжийн мэдээлэл байна. Алга болсон гэрчийн мэдүүлэг нь “Мөрдөгч Г.Т нь хэргийн холбогдогчоос сар бүр бэлнээр мөнгө авдаг байсан гэх ба албан тушаалын байдлаа урвуулан ашиглаж бусдаас авлига авахыг шаардсан, авлига өгөгч этгээдийг дарамталсан” гэдэг агуулгатай байсан ч ийнхүү нотлох баримт устсан байна.

Энд дурдахад, дээрх хэрэгт мөн л Эрүүгийн цагдаагийн албаны газрын дарга, нэр бүхий дэд хурандаа хамжигчаар оролцсон байж болзошгүй бөгөөд түүнд ч мөн цол нэмж хурандаа цол олгожээ.

Энэ жишээнээс үзвэл хууль сахиулагчид үүргээ эсрэгээр нь биелүүлж, хэдэн мянган айл өрхийн амьдралыг бусниулж буй мөрийтэй тоглоомыг нийтэд түгээх ажилд хүчин зүтгэж байна. Үүнийхээ шанд цол нэмж, тушаал дэвшиж байгаа нь үнэнч шударга алба хаагчдын хөдөлмөр зүтгэлийг уландаа гишгэж, хуулийн байгууллагад итгэх иргэдийн итгэлийг эвдэж байгаад албаныхан анхаарах цаг иржээ.