Ачааны машины тэвш өндөр хүчдэлд хүрснээс нэг иргэн амь насаа алджээ

Өчигдөр буюу есдүгээр сарын 27-ны өдөр том оврын автомашины жолооч, цахилгаанд цохиулж нас баржээ.

Тодруулбал, өчигдөр өдрийн 13.35 цагт "Улаанбаатар хот, Баянзүрх дүүргийн 11 дүгээр хороо, “Залаатын-Ам” гэдэг газар автомашин шатаж байна" гэсэн дуудлага онцгой байдлын албанд ирсний дагуу, Хан-Уул дүүргийн Онцгой байдлын хэлтсийн Гал түймэр унтраах, аврах 14 дүгээр ангийн алба хаагчид 10 км замыг туулан 13:54 цагт очиход иргэн Б-ын “Хово-ZZ3255” загварын ачааны автомашин 10 кВ-ын өндөр хүчдэлийн цахилгаан дамжуулах агаарын шугамд тэвшний хэсгээр хүрснээс автомашины дугуй шатаж байсныг таван минут ажиллаж унтраажээ.

Тус гал түймэрт иргэн Б/61 настай, эрэгтэй/ цахилгаанд цохиулан нас барсан байсныг цогцсыг гарган тус дүүргийн Цагдаагийн гуравдугаар хэлтэст шилжүүлэн өгсөн гэж Онцгой байдлын ерөнхий газраас мэдээллээ.