Сагсан бөмбөг: Францчууд гэртээ харихаас айж байна

Сагсан бөмбөгийн ДАШТ Индонез, Япон, Филиппин улсуудад үргэлжлэн явагдаж, эхний сенсаацууд гарч эхэллээ.

Тэмцээний өмнө түрүүлэх магадлалтай багуудын тоонд бичигдэж байсан Францын шигшээ баг эхний хоёр тоглолтдоо ялагдаад хэсгээсээ гарах боломжгүй боллоо.

Тэд эхний тойрогт Канадад 65:95 бут ниргүүлж, өчигдөр Латвийн багт 12 оноо илүү сүүлийн үеийг эхлүүлээд ялагдсан билээ. Францчууд сүүлийн тоглолтоо ижилхэн хоёр ялагдалтай Ливантай хийнэ.
 

Николя Батюм “Бид энд итгэл найдвар дүүрэн ирсэн ч олон хүний, юуны өмнө өөрсдийнхөө урмыг хугалж орхилоо. Миний хувьд багаа удирдаж, заах хүн нь байсан ч чадсангүй. Миний буруу. Шөвгийн найм, хагас шигшээд ялагдсан бол хичээсэн, тэмцсэн гэж хэлж болох ч бид хэсгээсээ гарч чадсангүй. Одоо би гэртээ харихаас айж байна. Олон хүн бидэнд итгэж байсан болохоор би энэ өмсгөлийг өмсөхөөс ичиж байна” гэжээ.
 

Харин Руди Гобер “Маш хүнд ялагдал байлаа. Бид тоглолтыг сайн эхлүүлсэн ч дахиад л сахилга бат дутагдлаа. Самбараас бөмбөг авалт, алдаа гээд л жижигхэн зүйлүүд тоглолтын хувь заяаг шийдчихлээ. Мөн шүүгч нарын алдаатай шийдвэр нөлөөллөө. Гэхдээ бид өөрсдөөсөө болж хожигдсон. Бид толинд өөрсдийгөө сайн харах ёстой. Алдаанаас суралцах хэрэгтэй” гэсэн байна.