Казахстан орос бөхчүүдийг авахгүй гэв

Олон улсын тэмцээний хоригт ороод байгаа орос бөхчүүд олимпод орохын тулд гадаадын шигшээд орж барилдах магадлал тун өндөр байгаа. Учир нь Украины дайн удаашран, хэзээ дуусах нь тодорхой бус байна.

Чөлөөт бөхийн дэлхийн аварга Абасгаджи Магомедов Казахстаны иргэншил авах хүсэлт гаргасан талаар хэвлэлүүдээр гарсан. Орос бөхчүүдийг шигшээдээ авах эсэх талаар Азийн бөхийн холбооны тэргүүн, Казахстаны бөхийн холбооны ерөнхийлөгч, 1992 оны олимпын медальт Даулет Турлыханов мэдээлэл хийлээ. Дэлхийн бөхийн нэгдсэн холбооноос иргэншлээ сольсон тамирчин 2 жилийн дараа шинэ багт барилддаг байсныг долоон сар болгон багасгасан. Даулет орос тамирчнаас хүсэлт ирсэн эсэхийг баталж, эсвэл няцаахад бэлэн биш байна гэдгээ хэлсэн юм.

Казахстаны шигшээд гадаадын легионер цөөнгүй байсан. Сонгомол барилдааны Казахстаны цорын ганц олимпын аварга Юрий Мельниченко 1993 онд Киргизээс ирсэн. Армений Мкхитар Манукян, ОХУ-ын Даниял Гаджиев, Гүржийн Георгий Цурцумия нар Казахстаны багт олимпын медаль авч байлаа. Хамгийн сүүлийн жишээ бол 2014 онд Казахстаны иргэн болсон тува бөх Нурислам Санаев Токио олимпын хүрэл медаль авсан билээ.

Даулет Турлыханов “Оросын олон хүчтэй бөх гадаад орны нэрийн өмнөөс барилдах байх. Одоо ОХУ-ын бөхийн холбооны тэргүүн, миний найз Михаил Мамиашвилид тун хэцүү байгаа нь мэдээж. Бид Оросын холбоотой харилцаа холбоотой байхыг хичээж байгаа. Гэхдээ тэд хорионд байгаа болохоор бид өөрсдөө хорионд орчихгүй байхыг хичээхгүй бол болохгүй. Ер нь Орос, Беларусын тамирчидтай хамт бэлтгэл хийхийг хориглоогүй байгаа. Бөхийн төрөлд хүчтэй бэлтгэл хангагч их чухал. Энэ тал дээр гадаадын легионерүүд тус болсон. Гэхдээ 2024 оны Парисын олимпын наадамд бид казах тамирчдаараа багаа бүрдүүлж орно. Сонгомол, эрэгтэй, эмэгтэй чөлөөтөд манайд өөрийн авьяаслаг тамирчин олон бий” гэж ярилаа.