ХЭН ЮУ ХЭЛЭВ I Н.Цэрэнбатын үйлдлийг хууль зөрчсөн гэж үзнэ

“Хэн юу хэлэв" буланд СЕХ-ны нарийн бичгийн дарга Д.Даваа-Очир, УИХ-ын гишүүн асан, "Эрэл" группийн ерөнхийлөгч Б.Эрдэнэбат, "Хил хязгааргүй алхам" ТББ-ын тэргүүн Н.Баярсайхан нарын үгийг онцолж байна.

СЕХ-ны нарийн бичгийн дарга Д.Даваа-Очир: Нэр дэвшихээр горилогч Засгийн газрын мөрийн хөтөлбөр танилцуулаад явж байвал энэ нь  хууль бус сурталчилгаа. Хэрэв яг ийм асуудлаар иргэн гомдол гаргаад цагдаагийн байгууллагаас Зөрчлийн хуулийн дагуу шалгаж тогтоовол хууль зөрчсөн үйлдэл болно. УИХ, Засгийн газрын гишүүн асан Н.Цэрэнбат Засгийн газрын мөрийн хөтөлбөрийг баруун аймгуудад танилцуулаад явж байгаа нь хууль зөрчсөн үйлдэл мөн.

"Эрэл" группийн ерөнхийлөгч Б.Эрдэнэбат: Чөлөөт зах зээлийн амин сүнс өмчийн бүх хэлбэрийг Үндсэн хуулиар хамгаалсан. Хувийн өмчийг хуулиар хамгаалсан тогтолцоонд Монголын ард түмэн ажиллаж амьдарч байна. Гэтэл хотын дарга Х.Нямбаатар хүний хувийн өмчийг нураа, очиж шалгана гэж мафийн эзэн шиг ичгүүр сонжоогүйгээр зарлалаа.

"Хил хязгааргүй алхам" ТББ-ын тэргүүн Н.Баярсайхан: Бидний хувьд Байгаль орчинд нөлөөлөх байдлын үнэлгээний тухай хуулийн төслийг эгүүлэн татахыг шаардаж байна. 2019 оны Үндсэн хуулийн нэмэлт өөрчлөлтөөр газрын хэвлийн баялаг, байгалийн баялаг нь төрийн болон нийтийн өмч гэдгийг хуульчилсан. Газрын хэвлийн баялгийг ашиглахдаа ирээдүй үеийн эрүүл, аюулгүй орчинд амьдрах эрхийг баталгаажуулна гэдгийг тусгасан байдаг. Харамсалтай нь өдгөө боловсруулж нээлттэй болгосон хуулийн төсөл нь Үндсэн хуулийнхаа зорилтын эсрэг байна.