Нүүрсчдийн “НУУСАН ГЭРЧ”-ийг хаалттай шүүж, ял оноолоо

-Нэг нь өөрийгөө нүүрсний хулгайн хэрэгт ямар ч холбоогүй, нөгөө нь өөрийгөө "Нүүрсний хулгайн хамгийн том гэрч" гэгддэг Б.Ганхуяг, Т.Аюурсайхан нарын 11 хүнийг эрүүгийн долоон зүйл ангиар хаалттай шүүж, ял оноолоо-

Шүүх хурлын урьдчилсан хэлэлцүүлгийнхээ үеэр “Нүүрсний хулгайн хамгийн том гэрч” гэдгээ зарласан "Эрдэнэс Тавантолгой" ХК-ийн Гүйцэтгэх захирал асан Б.Ганхуяг, өөрийгөө "Ямар ч гэм буруугүй, хэлмэгдүүлж байна" гэх үгээ үргэлж тоть шиг давтдаг Хөдөлмөр, нийгмийн хамгааллын сайдаар ажиллаж байсан УИХ-ын гишүүн асан Т.Аюурсайхан нарын 11 хүнд холбогдох хэргийн гэм буруугийн шүүх хуралдаан 13 өдөр үргэлжилж, өнөөдөр /2024.01.31/ шүүх бүрэлдэхүүн шийдвэрээ танилцууллаа.

Шүүхээс тэднийг гэм буруутай хэмээн үзэж ял оноолоо. Тодруулбал, шүүгдэгч “Эрдэнэс Тавантолгой” ХК-ийн Гүйцэтгэх захирал асан Б.Ганхуягт 5 жил 9 сарын хорих ял, шүүгдэгч Хөдөлмөр, нийгмийн хамгааллын сайдаар ажиллаж байсан Т.Аюурсайханд 3 жилийн хорих ял оноож шийдвэрлэлээ. Ингэхдээ тэднийг нийтийн албан ажиллах эрхийг нь долоон жилээр хязгаарлалаа.

Тэднийг прокурорын байгууллагаас Эрх мэдэл, албан тушаалын байдлаа урвуулан ашиглах, нийтийн албан тушаалтан хахууль авах, худал мэдүүлэх, зохион байгуулалттай гэмт бүлэг байгуулах, түүнд элсэх болон үндэслэлгүйгээр хөрөнгөжих, хахууль өгөх, мөнгө угаах гэмт хэрэгт яллагдагчаар татаж, хэргийг Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд шүүлээ. 

Тэгвэл өмнө нь таван ч удаа хойшилсон шүүх хурлын үеэр шүүгдэгчТ.Аюурсайхан өөрийгөө дээрх хэрэгт ямар ч хамаагүй гэж тайлбарладаг. Тэрбээр "Энэ хэрэг дотор надтай холбоотой  зургаан үйлдэл бий. Нэг шанага ч нүүрсний асуудал байхгүй. Анх 2023 оны хоёрдугаар сарын 8-ны өдөр жагсаал цуглаан зохион байгуулсан, санхүүжүүлсэн гэх үндэслэлээр цагдан хорьсон. Есөн сарын дотор нэг ч мэдүүлэг аваагүй, нэг ч үг асуугаагүй. Дараа нь нүүрсний хэрэг сөхөгдсөн. Тэр дотор нэгийг нь ч үйлдээгүй. Дахин хэлэхэд, нүүрсний хулгайн хэрэгт би холбогдолгүй. Надад хэрэг үүсгэсэн прокурорын дүгнэлттэй санал нийлэхгүй" гэж хэвлэлд байр сууриа илэрхийлсэн байдаг.

Харин түүнээс ялгаатай нь "Эрдэнэс Тавантолгой" ХК-ийн Гүйцэтгэх захирал асан Б.Ганхуяг өөрийгөө “Нүүрсний хулгайн хамгийн том гэрч” гэдэг. Түүнийгээ ч шүүх хурлынхаа урьдчилсан хэлэлцүүлгийн үеэр зарласан билээ. Өөрөөр хэлбэл, шүүгдэгч Б.Ганхуяг хэн гэдэг дарга хэдэн хүрз нүүрс хулгайлсан гэдгийг тоо, ширхэг бүрээр нь, "нүүрс хулгайлах"-ыг өөрт нь болон өрөөлд хэн даалгасан гэдгийг нэр устайгаар нь мэднэ гэсэн үг.

Хэрэв эндээс сайн анзаарах юм бол шүүгдэгч Б.Ганхуягийн өмнө нь шүүх танхимд хэлсэн үгнээс давхар нэг утга уншигдана. Тэр жижиг гарын нүүрсний хулгайч, жинхэнэ "нүүрсний хулгайч"-дын гар хөл, хэлсэн ажлыг нь гүйцэтгэсэн "утсан хүүхэлдэй" төдий гэдэг нь тодорхой харагдаж байгаа юм. Тиймдээ ч нүүрсний хулгайн хэрэгт нэр холбогдож, яллагдагчаар татагдсан "Эрдэнэс тавантолгой" ХК-ийн Гүйцэтгэх захирал асан Б.Ганхуяг өөрөөр нь "туг тахих" гэж байгаа хэдэн дарга нартаа дохио өгсөн төдий. Хэрэв надаар туг тахих гэж байгаа бол би шүүх танхимд олон нийтэд бүгдийг нь ярина гэсэн л анхааруулга, тэдэнд илгээсэн мессеж байсан гэхэд болно.

Энэ ч утгаараа эхлээд мань эр нүүрсний хулгайгаа ярьж эхэлсэн. Түүний ярьж эхэлсэн гэдгийг цаад нөхөд нь ойлгосон ч тоогоогүй, хэн ч түүнтэй холбогдоогүй гэдэг нь уншигдаж байгаа юм. Үүнд бухимдсан, аргаа барсан Б.Ганхуяг хоёр дахь удаагийнхаа шүүх хурлын урьдчилсан хэлэлцүүлгээр "хашгирч" эхэлсэн байдаг.

Харамсалтай нь, нүүрсчид Б.Ганхуяг нарыг яриулахгүйгээр үл барам УИХ-аас зохион байгуулсан “Нүүрсний сонсгол”-д хүртэл оролцуулаагүй, “нууж” чадсан. Өөрөөр хэлбэл, УИХ-аас зохион байгуулсан "Нүүрсний сонсгол"-д “Эрдэнэс Тавантолгой” ХК-ийн Гүйцэтгэх захирал асан Б.Ганхуягийг гэрчээр дуудсан ч хуулийн байгууллагаас зөвшөөрөөгүй юм.

Тэгвэл нөгөө талд Хөдөлмөр, нийгмийн хамгааллын сайд асан Т.Аюурсайхан хэргээ хялбаршуулсан журмаар шийдэх тохироогоо хийсэн тул чимээгүй байгаа гэж ч ярьдаг. Ямартай ч нүүрсчдийн “нуусан” гэж хэлж болох Б.Ганхуяг нарын 11 хүнийг 13 өдрийн турш шүүж, шүүх бүрэлдэхүүн шийдвэрээ гаргалаа.