FIBA Asia Cup: Тайландын багт харамсалтайгаар ялагдлаа

Монгол улсын нийслэл Улаанбаатар хотноо “UG Arena”-д сагсан бөмбөгийн Азийн аваргын урьдчилсан шатны “D” хэсгийн тоглолтууд явагдаж, өндөрлөлөө. Тэмцээн таван өдрийн турш үргэлжилсэн бөгөөд Монгол, Тайланд, Малайз, Тахита, Вьетнам улсын тамирчид оролцсон юм.

Өнөөдөр манай Үндэсний шигшээ баг сүүлийн тоглолтоо Тайландын эсрэг хийлээ. Хэн хэн нь ялагдалгүй хэсгээ тэргүүлэхийн төлөөх хамгийн чухал тоглолт байлаа.

Тайландын баг тоглолтыг шууд холын шидэлтээр эхлүүлсэн. Эхий үеийн эхний хэсэг өгөө аваатай, өрсөлдөөнтэй өнгөрсөн ч сүүийн хагас Монголын багийнх, тодорхой хэлбэл Билгүүнийх байлаа. Билгүүн 11 оноо дараалан авч, эхний үе манайх 31-23 тэргүүлсэн. Манайхан бараг алдаа гаргасангүй.

Харин хоёрдугаар үед Тайландын багийн довтолгоо ширүүссэн. Бариулж эхэлсэн ч манайхан тухай бүр нь алсын шидэлтээр онооны зөрүүгээ хадгалсаар байлаа. Ингээд энэ үе 59:52 манай давамгайллаар өндөрлөлөө.  

Гуравдугаар үе эхлээд оноогоо нөхөх гэсэн тайчуудтай адил манайхан бужигнаж гүйж байгаад нэг л мэдэхэд тоо дөхсөн байлаа. Тайландын багийн Лиш дараалан холоос оруулснаар тайчууд тоогоор тэргүүлж эхэлсэн. Гуравдугаар үе 75:70 Тайландын багийн тэргүүллээр өндөрлөлөө. 

Дөрөвдүгээр үед Тайландын багийн хоёр америк тоглогч тоглолтыг дуусгахаар шийдсэн гарч ирсэн нь харагдаж байлаа. Тэдний бараг шидэлт бүр гоол болж, харин манайх боломжоо ашиглалгүй их удлаа. Маш харамсалтай 105:109 ялагдлаа. Ямар ч гэсэн манай тамирчид таван өдөр монголчуудаа баярлуулж чадлаа.