Монгол, Энэтхэгийн Гадаад харилцааны сайд нар утсаар ярив

2020 оны 05 сарын 29

Гадаад харилцааны сайд Д.Цогтбаатар өнөөдөр /2020.05.29/ Бүгд Найрамдах Энэтхэг Улсын Гадаад хэргийн сайд С.Жайшанкартай утсаар ярив.

Сайд Д.Цогтбаатар “COVID-19” цар тахалтай тэмцэх хүрээнд Энэтхэг Улсын Засгийн газраас авч хэрэгжүүлж буй арга хэмжээ үр дүнтэй байгааг тэмдэглэж, тус улсаас монгол иргэдийг саяхан эх оронд нь авч ирэхэд дэмжлэг үзүүлсэнд Энэтхэгийн талд талархал илэрхийлэв. Талууд иргэддээ дэмжлэг үзүүлэх чиглэлд үргэлжлүүлэн хамтран ажиллахаар тохиролцжээ.

Цар тахлыг даван туулахад бүс нутгийн улс орнуудын хамтын ажиллагаа, харилцан дэмжлэг нэн чухал болохыг сайд Д.Цогтбаатар тэмдэглээд энэ чиглэлд дэвшүүлж буй тодорхой санаачилгынхаа талаар танилцуулсан байна. Энэтхэгийн Гадаад хэргийн сайд С.Жайшанкар Монгол Улс дотооддоо халдварын тархалтгүй бөгөөд Монгол Улсын Засгийн газрын зүгээс шуурхай, оновчтой арга хэмжээ авч ажиллаж байгааг өндрөөр үнэлээд цаашид “COVID-19”-ийн эм хангамжийн чиглэлд хамтран ажиллахаа илэрхийлжээ.

Монгол Улсын Засгийн газар Газрын тос боловсруулах үйлдвэр байгуулах төсөлд онцгой ач холбогдол өгч байгааг сайд Д.Цогтбаатар онцлоод цар тахлын тархалтыг үл харгалзан төслийн хэрэгжилтийн явцыг улам эрчимжүүлэх талаар Энэтхэгийн талтай санал солилцов. Мөн Энэтхэг улстай худалдааг өргөжүүлэх, логистикийн боломжийг нэмэгдүүлэх үүднээс зарим бүтээгдэхүүнийг туршилтаар тээвэрлэх зорилгоор ажлын хэсэг байгуулсныг мэдээлж, талууд энэ чиглэлд хамтран ажиллахаар болжээ.

Энэ онд Монгол, Энэтхэгийн хооронд дипломат харилцаа тогтоосны 65 жилийн ой тохиож байгаа бөгөөд ойн хүрээнд Энэтхэгийн талаас тавдугаар сард хэрэгжүүлэхээр төлөвлөж байсан өндөр түвшний айлчлалыг “COVID-19” коронавируст халдварын тархалт намжсаны дараа ажил хэрэг болгохоор ярилцсан байна. Талууд олон улс, бүс нутгийн тавцанд идэвхтэй хамтран ажиллаж ирсэн уламжлалаа хадгалж, НҮБ зэрэг олон улсын байгууллагын хүрээнд цаашид ч нягт хамтран ажиллахаар тохиролцжээ.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top