НӨАТ-ын буцаан олголтыг 5 хувь болгох талаар ХЭН ЮУ ХЭЛЭВ?

Б.Гантуяа | Zindaa.mn
2023 оны 10 сарын 20

НӨАТ-ын буцаан олголтыг 2 хувиас 5 хувь болгож нэмэгдүүлэх асуудлаар иргэдийн саналыг УИХ цахим системээр дамжуулан авч эхэлсэн. Богино хугацаанд олон мянган иргэний дэмжлэг аваад буй энэ асуудлаар УИХ-ын дарга Г.Занданшатар, Сангийн сайд Б.Жавхлан нар эсрэгцсэн нь гол сэдэв байлаа.

Тэгвэл энэ сэдвээр судлаачид, хувийн хэвшлийнхэн хэвлэлээр болон нийгмийн сүлжээний хаягаараа дамжуулан өөрсдийн байр сууриа идэвхтэй илэрхийлж байна.

  • Эдийн засагч Б.Лхагважав:

НӨАТ-ын буцаан олголтын хувийг нэмэх ёстой ёстой. Одоо иргэдэд НӨАТ-ын 20 хувь буюу орлогын хоёр хувийг нь буцаан олгодог. Үүнийг 30, 40, 50, 60 хувь болгон өсгөж, ялгавартай өгч болно. НӨАТ-ын буцаалтуудын хамгийн гол оньс нь хар мөнгийг давхар илрүүлдэг. Газрын наймаа, авлигыг илрүүлье гэвэл тэнд нь НӨАТ-ыг 100 хувь буцаагаад өгчих хэрэгтэй.

 

  • Эдийн засагч, "Новел" группийн ТУЗ-ийн дарга Д.Ангар:

Үнэхээр татвар төлөөд тэр нь улсын хөгжлийн төлөө, иргэдийн тав тух, аюулгүй бдал, эрүүл мэнд, боловсролд зөв зүйтэй зарцуулагддаг бол өндөр татвар, өндөр НӨАТ төлөх нь хамаа алга. Гол нь татварын мөнгийг манай дарга нар ногоон автобус шиг зарцуулчихдаг учраас л татвар төлмөөргүй санагддаг болсон. Тиймээс би НӨАТ-ын буцаан олголтыг 5 хувь болгохыг дэмжиж байна.

 

  • "CEO" клубын ерөнхийлөгч Б.Гантулга:

Одоогийн улсын төсөвт гэнэтийн ачаалал үзүүлэхгүйгээр эхний ээлжид НӨАТ-ын буцаан олголтыг 5% болгох боломжтой гэж бодож байна. Эргээд бизнес эрхлэгч нарын орлогын бүртгэлжилт сайжирснаар урт хугацаандаа Татварын орлого бүрдүүлэлт сайжирна. Одоогийн ДНБ-ий 27%-тай тэнцэж буй далд эдийн засгийг ил болгоход иргэд өөрсдөө оролцоно гэсэн үг. Татвараас зугтсан нь хождог, төлсөн нь хохирдог тогтолцоо арилах, чөлөөт зах зээл, бизнесийн өрсөлдөөний орчин нэг болох алхам хийгдэнэ. Иргэдийн татварын ачаалал буурна.

 

  • Эдийн засагч, профессор Л.Оюун:

НӨАТ-ын буцаан олголтыг 5 хувь болгож нэмэгдүүлснээр төсөв буурахгүй. Төр иргэдээс авсан мөнгөө буцаан өгч байгаа учраас төсвөөс нэмэлт мөнгө гарахгүй. Иймд Сангийн сайдын тайлбар буруу юм. Зүйрлэвэл, бид төрд өгсөн 10 төгрөгийнхөө тавыг нь авч байгаа учраас төсөвт ямар ч хамааралгүй. Өөрөөр хэлбэл, төсөвт НӨАТ-ын орлого гэж бүртгэгдэж байгаа учраас нэмэлт хөрөнгө шаардагдахгүй.

 

 

 

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Ard (66.181.187.139)  2023 оны 10 сарын 20

5 % bolgoochee hurdan.yuugaa hiine be .Huurnuud yumasa neeere.uhtelee byjsan ta nart yu ch bish bhldaa

0  |  0
хаалга захиалах (122.201.23.219)  2023 оны 10 сарын 20

Төрийн дээд удирдлага /ИХ-ын дарга/ Сангийн яам эсэргүүцэж байгаа нь төсвийн хөрөнгийн урсгал хаашаа чиглэж хэнийг тэтгэж байгааг бодитоор харуулж байгаа юм. Яагаад гэвэл төсвийн тэлэлт ард түмний орлогоос хэд дахин илүү нэмэгдэж байгааг эдийн засгийн тоо баримт харуулж байгаа шд. Энэ их тэлэлтийн арднь удирдах дээд байгууллагын тансаглал нуугдаж байна. Хэн өөрийнхөө идэж байгаа хоол ундаа хэн нэгэнтэй хуваалцахийг хүсэх бэ.

0  |  0
Top