Ирэх мягмар гарагт 100 микро автобустай жагсаал хийнэ

Хувиараа нийтийн тээврийн үйлчилгээ эрхлэгчдийн Үйлдвэрчний эвлэлийн холбооноос “Зууны мэдээ” сонины Үндэсний мэдээллийн төвд өнөөдөр хэвлэлийн бага хурал хийлээ. Тэд Нийслэлийн  тээврийн газраас гаргасан шийдвэрийг эсэргүүцэж байгаагаа илэрхийлсэн юм. Учир нь Нийслэлийн тээврийн газраас бага оврын микро автобусыг нийтийн тээврийн үйлчилгээнээс халах зорилгоор зарим шугам чиглэлийг хааж эхэлсэнтэй холбоотой юм байна. Тухайлбал, СХД-ийн 23 дугаар хорооноос, БЗД-ийн 21 дүгээр хороо хүртэлх маршрутыг хааснаас болж  иргэдийг хохироогоод зогсохгүй жолооч нарын ажлын байр хөндөгдөж байгааг онцолж байна. Тиймээс энэхүү шийдвэрийг  3-4 жилээр хойшлуулж, хуучин маршрутаар нь явуулж өгөхийг хүссэн 400 хүний гарын үсгээр баталгаажуулсан албан бичгийг   Нийслэлийн тээврийн газар  болон Улаанбаатар хотын захирагч Э. Бат-Үүлд  хүргүүлээд байгаа боловч хариу өгөхгүй байгаа ажээ. Тиймээс тэд ирэх мягмар гаригт Чингисийн талбайд 100 микро автобустай жагсаал хийнэ гэдгээ мэдэгдээд байна. Өмнө нь СХД-ийн 23 дугаар хорооноос Дамбадаржаагийн чиглэлийн маршрутыг зогсоосон. Бид шүүхэд гомдлоо гаргаж захиргааны хэрэг үүсгэсэн боловч НТГ-аас өргөдлөө аваач гэдгээр нь  авч байсан. Шүүхээс бидний талд шийдэж байсан. Энэ удаа энэхүү зогсоодог, торгодог шийдвэрээ эргэн харж ямар нэгэн гарц олох талаар бидэнтэй зөвшилцөхийг хүсч байна. Бага оврын автобус үйлдвэрлэдэг “ Эко-автобус” компанитай ярилцаж төрөөс дэмжлэгтэйгээр шинэ автобус үйлдвэрлэх  боломж байгааг олж харсан. Бидэнд  ажлын байр хэрэгтэй бол, иргэдэд энэ үйлчилгээ бас хэрэгтэй байна гэж Хувиараа нийтийн тээвэрийн үйлчилгээ эрхлэгчдийн Үйлдвэрчний эвлэлийн холбооны тэргүүн Т.Баатар хэлж байсан.Одоогоор 2010 онд үйлдвэрлэгдсэн микро автобус 300 орчим байдаг ажээ.