Өвлийн триатлоны УАШТ-д Б.Ачбадрах, Н.Энхжин нар өнгөллөө

Өвлийн триатлоны Улсын аварга шалгаруулах анхдугаар тэмцээн хоёрдугаар сарын 24-ний бямба гарагт "Мишээл" байгаль орчин, танин мэдэхүйн хүрээлэнд амжилттай зохион байгуулагдаж, өндөрлөлөө. Хот, хөдөө, спорт хороод, клубийн 40 шахам тамирчид тус тэмцээнд оролцож, цасан замаар 2 км гүйж, 5 км дугуй жийж, 3 км гүйлтийн цанаар хурд хүчээ сорин уралдсан юм.

Тэмцээний эрэгтэй элит ангилалд 10 тамирчин өрсөлдсөнөөс гүйлтийн цанаар “Пёнчан-2018”, “Бээжин-2022” цагаан олимпын наадамд уралдсан, ДАШТ-ий хүрэл медальт, ОУХМ Б.Ачбадрах (Хилчин спорт хороо) 30 минут 05,34 секундээр хол тасархай түрүүлжээ. Мөнгө, хүрэл медалийг “Канвон-2024” залуучуудын олимпод уралдаад ирсэн гүйлтийн цанын залуу ОУХМ А.Хүслэн (Алдар спорт хороо) 31 минут 00,86 секунд, “Харбин-2024” Дэлхийн цомын 5 дугаар байрын шагналт, Дэлхийн чансааны 11 дүгээрт бичигдсэн Н.Алтаншагай (Зэвсэгт хүчний 011 дүгээр анги, “Сеперате” компанийн тамирчин) 35 минут 52,35 секундаар хүртэв. Удаах байрт Канвон-2024 залуучуудын олимпын наадамд оролцсон, биатлоны спортын ОУХМ Т.Амарсанаа, гүйлтийн цанын ОУХМ Г.Энхнасан, “Харбин-2024” Дэлхийн цомын 6 дугаар байрын шагналт, Дэлхийн чансааны 12 дугаарт бичигдсэн “Роүд Монголиа”-гийн спортын мастер Л.Баярцэнгэл нар шалгарлаа.

Эмэгтэй элитийн уралдаанд 9 тамирчин хурд сорьж, гүйлтийн цанын 16 настай спортын мастер Н.Энхжин (Цасан зам клуб) 45 минут 34,45 секундээр анхны УАШТ-д ялалт байгууллаа. Мөнгө, хүрэл медалийг Төв аймгийн залуу тамирчин Н.Отгонтэнгэр, Отгонзул хүртэж, гүйлтийн цанын спортын мастер Ж.Халиунаа (Хилчин спорт хороо) удаалав.

Өвлийн триатлоны УАШТ-ий хөвгүүдийн ангилалд Төв аймгийн М.Баясгалан, Б.Төгөлдөр, сонирхогчдын ангилалд Зэвсэгт хүчний 150-р ангийн Р.Дашдаваа, Хилийн цэргийн 0101-р ангийн Б.Лхагвабаатар, 0151-р ангийн Ц.Энхболд нар медалийн эзэд боллоо. Түүнчлэн сонирхогчдын дээд насны ангилалд ХХЕГ-ын дарга асан, хошууч генерал Ш.Лхачинжав, цэрэгжлийн спортын дэд мастер Ю.Туяа нар амжилттай уралдсан юм.

Тэмцээнийг Монголын Триатлоны холбоо (МТХ)-ноос зохион байгуулж, Ерөнхий ивээн тэтгэгчээр “Сеперате” ХХК, хамтрагч, дэмжигчээр “Сандагаа багш цана-дугуйн холбоо” ТББ, Yндэсний кофе шопын сүлжээ “Caffe Fonte”, Мишээл байгаль орчин, танин мэдэхүйн хүрээлэн ажиллав.

Фотог:  Д.Нямбилэг