Хэн нь ХЯТАД ВЭ?!

Монгол Улсын Ерөнхийлөгч асан Х.Баттулга, Эдийн засгийн хөгжлийн сайд Ч.Хүрэлбаатар нар "Хэн нь Монгол, хэн нь Хятад" болохоо үзэхээр шийджээ. Ингэхдээ тэдний хэн хэн нь хөшигний ард суусангүй, арга хэлбэр нь л өөр болохоос аль аль нь байр сууриа гарч ирж илэрхийлэв.

Оны өмнөхөн Ч.Хүрэлбаатартай холбоотой хэд, хэдэн мэдээлэл цацагдсан. Тэрхүү мэдээллийн ард "Женко" Х.Баттулга бий гэдгийг ч Ч.Хүрэлбаатар мэдэгдэж, цахим хуудаснаа бичиж байлаа.

Түүний "Чамаас хятад ген 0.1 хувь илэрвэл чи улстөрөөс үүрд зайл, надаас 0.1 хувь илэрвэл би улстөрөөс үүрд зайлъя. Болсон болоогүй нэвтрүүлэг, эвлүүлэг хийж ард иргэдийн тархи толгой эргүүлж байснаас шинжлэх ухааны үндэслэлтэй энэхүү аргыг сонгоё. Х.Баттулга аа, чацга царайлаад байлгүйгээр 14 хоногийн дотор хариугаа өгөөрэй. Цус ярьж монголчуудыг дотор нь хуваадаг, хэрэлдүүлдэг, улстөржүүлдэг, алалцуулдаг цаг үүгээр дуусаг" хэмээх жиргээг уншигчид олж харсан л байх.

Тэгвэл өнөөдөр /2024.01.10/ "Женко" Х.Баттулга өөрөө гарч ирж, Эдийн засгийн хөгжлийн сайд, УИХ-ын гишүүн Ч.Хүрэлбаатар нарын өргөн барьж, УИХ-аар хэлэлцүүлж байгаа Хөрөнгө оруулалтын тухай хуулийн нэмэлт, өөрчлөлтийн төслийг эсэргүүцсэн үйлдэл нь улс төрд содон үйл явдал байлаа.

Харин "Женко" Х.Баттулгын мэдээллийн дараа Ч.Хүрэлбаатар сайд ч хариу тайлбарыг нь өгөв. Түүний хэлсэн "Бүх гүтгэлэг, доромжлолыг зохион байгуулсан эзэн нь өөрөө гарч ирлээ. Х.Баттулга гэдэг хүн Ерөнхийлөгчөөсөө буусан ч бусдад нөлөөлдөг хэвээрээ байгаа юм байна" гэх үг гол хүнийх нь чихэнд хэр наалдсан бол гэдэг нь сонин. Ингээд Монгол Улсын Ерөнхийлөгч асан Х.Баттулга, Эдийн засгийн хөгжлийн сайд асан Ч.Хүрэлбаатар нарын хийсэн мэдээллээс товчлон, тоймлон хүргэе.

Х.БАТТУЛГА: НАДАД Ч.ХҮРЭЛБААТАРТАЙ ЯМАР Ч ХУВИЙН АСУУДАЛ БАЙХГҮЙ

Монгол Улсын Ерөнхийлөгч асан Х.БАТТУЛГА: Ч.Хүрэлбаатарын өргөн бариад байгаа Хөрөнгө оруулалтын гэгч хуулийн талаар Монгол Улсын Ерөнхийлөгчөөр ажиллаж байсан хүний хувьд, Г.Занданшатартай Үндэсний аюулгүй байдлын зөвлөл дээр ажиллаж байсан хүний хувьд энэ асуудлаа олон нийтээр хэлэлцүүлээч ээ гэж хүслээ. Учир нь, газрын асуудалд бид хөнгөн хуумгай хандаж болохгүй. Өнөөдөр нэг нам дангаараа олонх байгаа тохиолдолд нарийн эмзэг энэхүү асуудлыг дараагийн 2024 оны сонгуулиар, нэгэнт 126 гишүүнтэй томсгосон тойргоор сонгуулийг явуулах гэж байгаа юм бол тэр бүтцээрээ хэлэлцүүлээч ээ гэж хүсэж байгаа юм. Өнөөдөр 1993 онд тавигдсан гадаадын хөрөнгө оруулалтын 100 мянган ам.долларыг 2013 онд тавигдсан гэж толгой эргүүлж яриад байгаа юм. Энэ 100 мянган ам.долларын босго байхгүй болоход өнөөдөр хөрөнгө оруулагч нэртэй ямар ч хүн орж ирээд манай газар нутаг дээр газар эзэмшиж, гэр бүлээрээ оршин суух боломжийг бий болгосон цоорхой хууль болох нь ээ. Иргэдээрээ хэлэлцүүлээч, 2024 оны УИХ-ын сонгуулийн дараа хэлэлцүүлээч ээ гэдэг байр суурийг Монгол Улсын Ерөнхийлөгч байсан хүний хувьд санаа зовж, АН-ын гишүүдтэйгээ хамтарч уулзлаа. Г.Занданшатар дарга хүлээж авч байна, хүлээж авах ёстой л доо. Гадаадын хөрөнгө оруулагчдыг татахын тулд хууль тогтоомж тогтвортой л байх ёстой. Надад Ч.Хүрэлбаатар гэдэг хүнтэй ямар ч асуудал байхгүй. Хувь хүн талаас нь юм байхгүй. Надад ер нь нөлөөлөөгүй зүйл байгаа юм уу. Нэг хүн хальтраад унахад хүртэл намайг нөлөөлсөн гээд л биччихсэн харагдаж байна шүү дээ.

Ч.ХҮРЭЛБААТАР: БҮХ ГҮТГЭЛЭГ, ДОРОМЖЛОЛЫН АРД Х.БАТТУЛГА БАЙСАН

Эдийн засгийн хөгжлийн сайд, УИХ-ын гишүүн Ч.ХҮРЭЛБААТАР: Гадаадын хөрөнгө оруулалтын тухай хуулийн нэмэлт, өөрчлөлтэй холбоотой хэвлэлийн хурал зарласан. Та бүхэн анзаарсан бол өнгөрсөн оны арванхоёрдугаар сарын 29-ний өдрөөс эхэлж Ч.Хүрэлбаатар бол Хятадын эрлийз, хурлийз гэдэг гүтгэлгийн мэдээнүүдийг тараасан. Дараа нь, Гадаадын хөрөнгө оруулалтын тухай хуульд Монгол Улсын газрыг Ч.Хүрэлбаатар 100 жилээр гадаадынханд олгох гэж байна гэдэг гүтгэлгийг ч гаргасан. Энэ бүхнийг зохион байгуулж байсан эзэн нь өнөөдөр гарч ирлээ. Эзэн нь өөрөө гарч ирж хэвлэлийн хурал зарлаж, Гадаадын хөрөнгө оруулалтын тухай хуульд нэмэлт, өөрчлөлт хийлгэхгүй байх шаардлагыг УИХ-ын даргад уламжиллаа. Би Х.Баттулгыг Монгол Улсын Ерөнхийлөгч байхад нийт долоон удаа хориг авч байсан. Одоо Ерөнхийлөгч биш байж найм дахь хориг нь ирж байх шиг байна. Энэ хэвлэлээр хийж байсан бохир дайралт, гүтгэлэг, доромжлол бүхнийг зохион байгуулж байсан эзэн нь гарч ирсэн болохоор мэдээлэл хийж байна. Л.Оюун-Эрдэнийн Засгийн газар гадаадын хөрөнгө оруулагчдын гомдлыг ярьдаг. Засгийн газар дээр хөрөнгө оруулагчдын асуудлыг тавиад ирсэн. Эхлээд найман гомдол байсан. Одоо 69 гомдол ирээд байна. Тиймээс хуулийн хэлэлцүүлгийг хийхдээ аж ахуйн нэгжүүдийг бүгдийг нь оролцуулж хийгээд оруулж ирж байгаа юм. Миний үйл ажиллагаа бол олон нийтэд ил байдаг. Би далдуур хүнийг турхирч, ажил хийлгэдэггүй. Энэ бол миний үндсэн зарчим. Эзэн нь өөрөө гараад ирлээ. Энэ хүн Ерөнхийлөгчөөс буусан ч гэсэн бусдад нөлөөтэй хэвээр байгаа юм байна гэж л харж байна.