Хэнтийн наадмын их насны түрүү морины будлианыг нэмж будилуулав

Хэнтий аймгийн 100 жилийн ойн баяр наадмын их насны хурдан морины уралдааны будлиан өдөр хоног өнгөрөх тусам тайлагдах бус харин ч бүр өөрчлөгдөн, улам будилж эхэллээ.

Их насны морины уралдаанд нийт 148 морь бүртгүүлснээс сэрвээний өндрөөр 20 морь хасагдаж, эдгээр морьдын дунд байсан 19 дугаартай Хөвсгөл аймгийн уяач Б.Отгонсэлэнгийн хээр морийг хашаанаас гаргаж, уралдуулсан хэмээн түрүү морины амжилтад тооцоогүй нь маргааны гол үндэс болсон.

Тэгвэл Хэнтийн наадмын хурдан морины хороо өчигдөр мэдэгдэл гаргахдаа “...бусад морьдын хамт хашсан байсныг аймгийн Цагдаагийн газрын нэр бүхий албан тушаалтан хүч түрэн гаргаж уралдуулсн байна...” гэж дурдсан юм.

Гэтэл өнөөх хороо дахин мэдэгдлээ шинэчлэхдээ “...бусад морьдын хамт хашсан байсныг хүч түрэн гаргаж уралдуулсан байна...” болгож өөрчилжээ.
 

Өөрөөр хэлбэл, эхний мэдэгдлээсээ “Цагдаагийн газрын нэр бүхий албан тушаалтан” гэдэг үгийг хасчээ.

Ийнхүү мэдэгдэлд нэг бол цагдаагийн ажилтан гарч ирээд, нэг бол алга болоод байгаа нь нэг бол сэрвээний өндрөөр хасагдсан, хасагдаагүй гэдэгтэй агаар нэгэн асуудал болж, адармаа дээр адармаа нэмж, ард иргэдийн бухимдлыг улам төрүүлж эхэллээ.

Хурдан хээр морины эзэн Б.Отгонсэлэнгэ “Би үнэндээ мориныхоо хийморийг бодоод цоллуулчихъя гэж бодсон. Бай шагналыг би авахгүй ээ. Түүнийг би Хэнтийн эмнэлэгт хандивлачихаад явна” гэж мэдэгдсэн. Хэргийн учир автомашин авахдаа бус харин нэгэнтээ түрүүлсэн морь, морины эзэн, морь унасан хүүгийн урмыг бодъё гэсэн билээ.