Н.Батсуурь: Би барилдаан цуцлах гэж ирээгүй

XVII жарны "Буян үйлдэгч" хэмээх усан барс жилийн хаврын тэргүүн сар, сар шинийн баярт зориулсан Улс, аймгийн алдар цолтой 256 бөхийн барилдааны нэг, хоёрын даваа өнөөдөр (2022.01.31) болж байна. 

Өнөөдрийн барилдаанд аварга Н.Батсуурь хүрэлцэн ирж, зодог шуудгаа өмссөн ч МҮБХ-ны удирдлагуудтай уулзсаны дараа тэрээр өөрийг нь цагаан сарын дараагаас заал, танхимын барилдаанд зодоглуулна гэсэн Тэргүүлэгчдийн хурлын шийдвэр хэвээрээ эсэхийг лавлаж, уг шийдвэр дээр Тэргүүлэгчдийн гарын үсгийг зуруулахыг хүсэж байгаагаа уламжлаад, "Уг нь би барилдах гэж ирсэн. Гэхдээ МҮБХ-той ярилцаж, ойлголцсоны дагуу ард түмнээ хүндлээд, өнөөдрийн барилдаанаас нэрээ татаж байна" гэдгээ илэрхийлсэн билээ.

Түүний байр суурийг хүргэж байна.

ДАЯН АВАРГА Н.БАТСУУРЬ:

-МҮБХ-ны шийдвэрийг та хэр шударга гэж хүлээн авч байна вэ?

-Шударга гэхэд шударга биш, шударга бус гэхэд бас биш. Ямар ч утгагүй шийдвэр санагдаад байгаа. Цагаан сарын барилдаан хийлгүй хоёр жил болсон. Тийм болохоор л би барилдахаар ирсэн. 

-Эд зүйлтэй холбоотой маргаан байсан. Энэ юу болсон бол?

-Нэгдүгээр сарын 13-нд би "Бөхийн өргөө"-нд барилдах гэж ирсэн. Барилдахаар ирсэн намайг бүртгэж аваагүй. Би барилдахгүй гэж хэлээд гарсан. Надтай хамт явсан хүн юм хагалсан. Тэр хохирлыг нь барагдуулж, хувцас солих өрөөний толины төлбөрийг төлсөн. Гол нь барилдах гэж ирсэн гэдгийг та нар минь бодож үзээрэй. Барилдаан цуцлах гэж ирээгүй, юм эвдэх гэж ирээгүй, барилдах гэж л ирсэн. 

Сая МҮБХ-ноос намайг барилдуулахгүй тухай тогтоолыг богино хугацаанд танилцууллаа. Тулгаж өглөө. Сая би зодог, шуудгаа өмсөөд, дэвжээнд гарахын өмнө ирлээ шүү дээ. Долоо хоногийн өмнө өгч болох байсан. Яагаад ингэв гэдэг нь бас сонин байна. Дөнгөж сая хувцсаа өмсөөд зогсож байхад намайг барилдуулахгүй тухай тогтоолыг өгсөн. Тэгээд би гарч чадсангүй.  

-Хэрэв тогтоол ирээгүй байсан бол барилдах байсан уу?

-Тогтоол ирээгүй бол би барилдана. 

-Бөхчүүд допингийн эсрэг тэмцэж байна гээд 11 сараар эрхийг нь хасаад байгаа. Энэ эсэргүүцлийг та аль өнцгөөс нь харж байна вэ?

-Зарим бөхчүүдтэй сая уулзаад ярилцаж байхад адил тэгш гэж харж байгаа хүмүүс байна. Хэрэглэсэн хэм хэмжээгээр гэж ойлгож байгаа хүмүүс байна. Хүн хүн өөр өөр л бодолтой байна. Яг үнэндээ энэ шийтгэл би өөртөө өгчихсөн шийтгэл биш шүү дээ. Баяр наадмын комиссын өгсөн шийтгэл. Би түүнийг 18 сар болгож, давуулан биелүүлээд орж ирж байна гэж бодсон.