Тэрүнофүжи: Ёкозүна болох боломж нүдний өмнө, ойрхон ирлээ  

Ирэх сарын 4-нд эхлэх мэргэжлийн сүмо бөхийн Нагоя башёд манай бөх Тэрүнофүжи ёкозүна цолны болзол сонсоод байгаа билээ. Тэрээр өнгөрсөн Зуны тэмцээнд 12 даваагаар түрүүлсэн.

Тэрүнофүжи Спортс сонины сэтгүүлчид онлайн ярилцлага өгчээ.
 

 -Нагоя башёгийн банцүкэ гарсан. Танд юу бодогдож байна?

-Чухал тэмцээн ойртож байна даа гэж бодож байна. Гэхдээ миний хувьд нэг их өөрчлөгдсөн зүйл алга. Бэлтгэлээ сайн хийх хэрэгтэй.

-Амжилттай барилдвал ёкозүна болно шүү дээ.

-Боломж яг л нүдний өмнө хүрээд ирлээ. Бэлтгэлээ сайн хийгээд хамаг чадлаараа хичээн зүтгэж, энэ боломжийг чулуу болгох хүсэлтэй байна.

-Ёкозүна гэдэг таны хувьд?

-Сүмо бөх болгоны авахыг хүсдэг цол. Ёкозүна цол хүртэж байж л ёкозүнаг ойлгоно гэсэн үг ч бий. Авахыг хүсэж байгаа цол минь. Залуу бөхчүүд сэкитори болохоороо амьдрал нь өөрчлөгддөг. Дээд зиндаанд дэвшсэний дараа комүсүби, озэки болохоор өөрчлөгддөг зүйл ч олон бий. Харин ёкозүна бол өөрөө болж үзээгүй хүн ойлгохгүй тийм цол юм.

-Өнгөрсөн башёд та озэки цолтой барилдаж, түрүүлсэн.

-Озэки цолтой байхдаа түрүүлж байгаагүй болохоор их туршлага болж өгсөн тэмцээн байлаа. Дараалан түрүүлэх ямар хэцүү байдгийг ухаарлаа. Бэлтгэлээ сайн хийхэд үр дүн өөрөө хүрч ирдэг.

-Биеийн байдал хэр байна?

-Зүгээр, сайн байгаа. Байнга хийдэг бэлтгэлээ хийж, Нагоя башёг угтана даа.

-Ояката багш ямар нэг зөвлөгөө өгсөн үү?

-Багш энэ боломжийг ашиглаарай, сайн бэлтгэл хий гэж зөвлөсөн. Бэлтгэл сайн хийсний ач тэмцээн дээр гардаг. Илүү дутуу юм бодолгүй, бэлтгэлээ л сайн хийнэ. Одоо бол ямар нэг сандарсан, эмээсэн, сэтгэл хөдлөсөн юм алга.

-Ёкозүна Хакүхо Нагояд барилдана.

-Өөрийгөө яая гэж байж, аваргын талаар юу хэлэх вэ. Өдөр өдрийнхөө барилдаанд анхаарч, 15 хоног сайн барилдах нь миний зорилго.

-Цар тахлын улмаас өнгөрсөн жил Нагояд башё явагдаагүй.

-Орон нутгийн башё хоёр жил явагдсангүй. Холбооноос аюулгүй байдлыг ханган, бөхчүүдэд барилдах боломж гаргаж өглөө. Би ч гэсэн хичээх болно.

-Ирэх тэмцээний зорилго?

-Ёкозүна цолны болзол сонссон ч ер нь бол өөрийнхөөрөө л барилдаж, хамгийн сүүлийн өдөр баяртай байхыг хичээх болно. Тэмцээний сүүлийн өдөр бүх хүч чадлаа шавхсан байхаар тооцоолон барилдах юм. Дэвжээнийхэн минь бэлтгэл хийх бүх нөхцлийг хангаж байгаа. Миний хувьд барилдах л үлдсэн.

-Ёкозүна болохын тулд юу хийх хэрэгтэй вэ?

-Ийм юм хийх хэрэгтэй гэх зэрэг гүн гүнзгий юм огт бодоогүй байгаа. Өөрийнхөө чадах бүхнийг хийгээд эцэст нь амжилт ирвэл сайн байна. Чадахгүй бол би ёкозүна болох гавьяагүй л гэсэн үг.