СЭЛЭНГЭ: Сүхбаатар сумын 4649 өрхөөс шинжилгээ авлаа

"Эрүүл иргэн, Эрүүл гэр бүл, Эрүүл Сэлэнгэ"-ийг баталгаажуулах зорилготой Монгол Улсын Засгийн газар, УОК-ын шийдвэрийн дагуу ЭМЯ-наас 40 эмчтэй баг Сэлэнгэ аймагт 2020.12.11-12-ны хооронд ажиллалаа.

Статистик мэдээллээр Сүхбаатар суманд 5825 өрх бүртгэлтэй байгаагаас шинжилгээнд хамрагдах бодит 4729 өрхийн мэдээллийг сумын ЗДТГ-аас гаргаж, шинжилгээнд хамруулах ажлыг зохион байгуулав.

2020.12.12-ны 20:00 цагийн байдлаар аймгийн хэмжээнд нийт 4649 сорьц авч ХӨСҮТ-д шилжүүлэхээр битүүмжилсэн бөгөөд төлөвлөсөн ёсоор энэхүү ажил 98.3%-тай хэрэгжсэн дүн гарлаа.

Шинжилгээний сорьцыг бүгдийг Улаанбаатар хотод хүргүүлж байгаа тул дүн 2-3 хоногт гарч баталгаажна.

Сэлэнгэ аймгийн Засаг дарга Ш.Оргил шинжилгээнд идэвхтэй хамрагдсан Сүхбаатар сумын иргэдэд талархал илэрхийлжээ.