Японы рагбид орсон монгол залуу Д.Норовсамбуу

Японы Саппоро хотын Яманотэ ахлах сургуулийн рагбийн багийн бэлтгэлд манай тамирчин Даваажавын Норовсамбуу анх удаагаа оролцлоо. Монгол залуу япончуудын анхаарлыг ихэд татсан тул бэлтгэл дээр сэтгүүлчид олноор ирсэн байв.

Д.Норовсамбуу сэтгүүлчдэд “Яманотэ сургуульд суралцаж байсан Майкл Лийчийн адил алдартай тамирчин болохын төлөө хичээх болно” гэж ярьсан байна.  

Майкл Лийч бол Японы рагбийн шигшээ багийн ахлагч. Наран орны багийг анх удаа дэлхийн шилдэг наймд багтахад гол үүрэг гүйцэтгэсэн тамирчин. Шинэ Зеландад төрсөн, аав нь Шинэ Зеланд, ээж нь Фижи хүн юм. 15 настайдаа анх Японд ирж, Саппоро хотын Яманотэ сургуульд суралцаж байжээ.

Майкл Лийч өнгөрсөн оны хоёрдугаар сард монгол тамирчин сургуульдаа авахаар шийдэж, долоодугаар сард нь Монголд ирж, сонгон шалгаруулалтаар Д.Норовсамбууг сонгож байсан юм.

Рагбигаар хичээллээд дөнгөж гурван жил болж байгаа ч Д.Норовсамбуу зургаан настайгаасаа чөлөөт бөх барилдаж байсан тул хөл сайтай нь үнэлэгдэж, Японд тэтгэлгээр сурах болсон байна.

“Норов бүрэг даруу ч их хөдөлмөрч, зүтгэлтэй хүүхэд. Мөн биеийн хөгжил сайн, гар, хөл мөч урттай. Би Японд анх ирээд сургууль, багш нарынхаа ачийг хариулах сан гэж бодож, хичээдэг байлаа. Норовыг ч гэсэн талархлын сэтгэлээ марталгүй, шилдэг тамирчин болохын төлөө хичээгээсэй гэж хүсэж байна” гэж Лийч шинэ шавьдаа итгэл хүлээлгэжээ.

Уг нь Д.Норовсамбуу өнгөрсөн дөрөвдүгээр сард хичээлдээ орох байсан ч цар тахлын улмаас хойшлогдсоор 10 сарын 28-нд л Японд очиж чаджээ. Карантины хугацаагаа дуусгаад энэ сарын 12-нд Саппород очсон байна.

Яманотэ сургуулийн баг 12 сард болох Бүх Японы аварга шалгаруулах тэмцээнд бэлтгэж байна. Хэрэв бэлтгэл ханах юм бол Д.Норвсамбуу тус тэмцээнд оролцож магадгүй гэж дасгалжуулагч нь сэтгүүлчдэд ярьжээ.  

Д.Норовсамбуу 2003 оны долоодугаар сарын 25-нд төрсөн. 184 см өндөр, 83 кг жинтэй. 15 настайгаасаа рагбигаар хичээллэсэн.