Чөлөөт бөх: Э.Төгсжаргалын барилдаан шилдгээр шалгарав

“Мюнхен-1972” олимпийн наадмын алт, “Монреаль-1976”-гийн мөнгө, ДАШТ-ий нэг алт, хошой мөнгө, нэг хүрэл медальт, Европын аварга, ЗХУ-ын гавьяат дасгалжуулагч Роман Дмитриевийн нэрэмжит чөлөөт бөхийн эрэгтэйчүүдийн залуучуудын олон улсын тэмцээн гуравдугаар сарын 8-10-нд ОХУ-ын Якутскт боллоо. Тус тэмцээнд манай улсын 10 тамирчин оролцож, нэг мөнгө, гурван хүрэл, нийт дөрвөн медаль хүртсэн амжилттай өндөрлүүлсэн билээ.

Энэ сарын 16-нд Якутскт болох “Дэлхийн Цом”-ын тэмцээний өмнөх туршилт гэж хэлж болох тус тэмцээнийг зохион байгуулагчид шилдгүүдээ шалгаруулжээ.

Роман Дмитриевийн нэрэмжит 7 дахь удаагийн тэмцээний шилдэг барилдаанаар финал, алтан медалийн төлөө барилдаан шалгарсангүй. Харин 61 кг-ийн жингийн хүрэл медалийн төлөөх барилдаан үзэгчдийн цөсийг хамгийн их хөөргөж, огшоосон барилдаанаар тодорсон байна.

Энэ барилдаанд манай бөх, “Хасу-Мегастарс” багийн тамирчин Эрдэнэбатын Төгсжаргал Америкийн Габриэл Роберт Таггтай барилдаж, 14-10 харьцаатай ялж, хүрэл медаль хүртсэн юм.