Сургууль, цэцэрлэгийн орчинд УХААЛАГ ГАР УТСЫГ хориглолоо

Засгийн газрын ээлжит 37 дугаар хуралдаан Засгийн газрын хуралдааны танхимд 08.00 цагт эхлээд байна.

Өнөөдрийн хуралдаанаар Ерөнхий боловсролын сургууль, цэцэрлэгийн сургалтын орчинд ухаалаг гар утас ашиглахыг ирэх сарын 1-нээс хязгаарлах асуудлыг хэлэлцэн шийдвэр гаргах юм байна. Ухаалаг утасны хэрэглээг хязгаарласнаар хүүхдүүдийг цахим халдлага, донтолтоос сэргийлж, сурлагын түвшинд эерэг нөлөө үзүүлдэг нь Лондонгийн их сургуулийн судалгаагаар тогтоогджээ. Тиймээс Засгийн газар дээрх шийдвэрийг гаргах гэж буй бөгөөд сургалттай холбоотой тусгай шаардлага гардаг учир хөгжлийн бэрхшээлтэй хүүхдэд нээлттэй байх аж. Багш нарын хувьд гар утасны хэрэглээ нээлттэй тул яаралтай үед эцэг эхчүүд багш нартай нь сургалтын үеэр холбогдож болох юм. Харин сургууль, цэцэрлэг тарах үед ухаалаг утас, түүнтэй адилтгах төхөөрөмж нээлттэй байна.

 Дашрамд дурдахад, Монгол Улс нийт 3 сая гаруй хүн амтай ч 6 сая орчим гар утас хэрэглэгдэж буй. Хүн амд ногдох сошиал сүлжээ хэрэглэгчид Ази тивийн орнуудаас 3.6 дахин их идэвхитэй байна гэсэн судалгаа бий юм.

Н.Туяа

WWW.ZINDAA.MN