Шатаж амь үрэгдсэн хүүхдүүдийн эцэг эхийг “чимээгүй” байхыг шаарджээ

Кемерово хотын “Зимняя вишня” Худалдааны төвд гарсан галын улмаас 64 хүн амь алдаад байгаа бөгөөд тэдэн дунд хүүхдүүд олноороо байсан билээ. Тэдгээр амь үрэгдсэн хүүхдүүдийн эцэг эхийг цогцос таниулахаар оруулахдаа элдэв хэл ам татлахгүй гэсэн амлалтын бичиг дээр гарын үсэг зурахгүй бол оруулахгүй гэсэн болзол тулгасан аж.

Энэ тухай уг хотын нэгэн иргэн “Эхо Москвы”-д мэдээлэл өгчээ. Кемеровын оршин суугч Александрын өгүүлснээр, гал түймэр гарсан “Зимняя вишня” Худалдааны төвийн ойр орчимд байрлах орон сууцны барилгын оршин суугчдын гар утас, камерыг цагдаагийнхан мөн хураан авч байсан гэнэ.

Уг гал түймрийн аюулыг нүдээр харсан гэрчүүдийг мөн элдэв зүйл ярихгүй гэсэн гарын үсгээ зурахыг шаардсан байна.

Дашрамд дурдахад, өнгөрөгч ням гаригт Кемерово хотын “Зимняя вишня” Худалдааны төвд аймшигт түймэр дэгдэж, 64 хүн амь үрэгдсэн билээ. Тэдгээр амь үрэгдэгсдээс одоогийн байдлаар 17 хүний цогцосыг таниулаад байгаа бөгөөд тэдний 8 нь хүүхэд байжээ.

Гал түймрийн аюул анх хүүхдэд зориулсан хэсгээс гарсан тул ийнхүү хүүхдүүд олноороо амь алдахад хүргэсэн бололтой. Мөн ойролцоох суурингийн сургуулийн сурагчид амралт эхэлсэнтэй холбоотойгоор уг Худалдааны төв доторх кинотеатрт үзвэр үзэж байгаад галд өртсөн нь үнэхээр харамсалтай хэрэг болсон юм. 

Д.Мөрөн