Сөүл дэх ЭСЯ | Бусдын боломжийг хязгаарлахгүй, соёлтой аялахыг уриаллаа
Монгол Улсын Засгийн газар аялал жуулчлалын салбарыг хөгжүүлж эдийн засгийг сэргээх зорилгоор манай улсад ирэх солонгос жуулчдыг 2022 оны зургаадугаар сарын 1-ний өдрөөс эхлэн 90 хүртэл хоногийн хугацаатай визгүй зорчуулахаар шийдвэрлэсэн.
БНСУ-ын талаас “Ковид 19” цар тахлын улмаас 2020 оноос түр зогсоогоод байсан богино хугацааны С-3 ангиллын болон олон удаагийн Multiple визийг сэргээж 2022 оны зургаадугаар сарын 1-ний өдрөөс эхлэн манай иргэдэд олгож эхлээд байна. Энэ шийдвэр гарснаар Солонгос Улсад аялах, эмчлүүлэх, гэр бүлдээ зочлох, худалдаа, үзэсгэлэнд оролцохоор ирэх иргэдийн тоо нэмэгдсээр байна.
Мөн БНСУ-ын Засгийн газрын шийдвэрээр Монгол, Вьетнам, Филиппин, Индонез зэрэг улсын бүлэг жуулчид Канвон мужийн Яньян олон улсын нисэх онгоцны буудлаар дамжин 2022 оны 10 дугаар сарын 1-ний өдрөөс эхлэн 15 хүртэл хоног визгүй зорчих журам хэрэгжихээр болсон.
Энэхүү хөнгөлөлттэй нөхцөлөөр БНСУ-д визгүй зорчихдоо тус улсын нутаг дэвсгэрээс зөвшөөрсөн хугацаанд гараагүй хугацаа хэтрүүлсэн иргэдийн тоо зорчсон нийт иргэдийн тооноос 5% давсан тохиолдол уг шийдвэр цуцлагдах тул манай иргэд бусдынхаа аялах боломжийг хязгаарлахгүй байхад анхаарч, тухайн улсын хууль дүрэм, журмыг зөрчихгүй, өндөр хариуцлагатай аялахыг уриалж байна!
БНСУ-ын Засгийн газрын дээрх шийдвэр нь цар тахлын нөхцөл байдлаас гадна манай иргэд хариуцлага алдах тохиолдолд цуцлагдах эрсдэлтэйг анхаарна уу.
КОНСУЛЫН ХЭЛТЭС
Холбоотой мэдээ
Сэтгэгдэл ( 0 )