А.Сүхбат: Хуучин цагаан хааны үеийн зэвсгээр Монгол Улсыг батлан хамгаалахгүй

Батлан хамгаалахын сайдад Н.Энхболдыг томиллоо. Энэ үеэр түүнд хандаж хэлсэн УИХ-ын гишүүдийн захиас, үзэл бодлыг хүргэж байна.

Лу.Болд:

Бүгдийг 100 хувь давхар дээлтэй сайд томилогдож байгаад АН дургүйцэж байгаа. Түүнээс биш үндсэн чиг үүргийн яамны сайдууд давхар дээлтэй байж болно гэж үзэж байна. Тиймээс Батлах хамгаалахын сайдад Н.Энхболд гишүүнийг дэмжинэ. Цэргийн байгууллага улстөржиж болохгүй шүү. Н.Энхболд гадаад харилцааны сайд байсан хүн учраас би олзуурхаж байна. Энхийг сахиулах үйлсэд сэтгэлтэй хандана гэдгийг нь мэдэж байна. Монгол Улсын нүүр царай болсон энхийг сахиулагчдаа анхаарч үзээрэй. Батлах хамгаалахын салбарт гарсан томоохон шинэчлэл бол барилга, бүтээн байгуулалтад цэргийн ангиуд оролцох болсон. Цаашдаа энэ ангиудыг өргөжүүлэх, томоохон төслүүд хэрэгжүүлж ажиллаасай. Сүүлийн үед цэрэг, иргэний харилцааны асуудал орхигдох гээд байна.

Ж.Батзандан:

Зэвсэгт хүчний Ерөнхий командлагч, Жанжин штабын дарга гэх субьект байгаа. Яамны сайд энэ хүнтэйгээ ойлголцож ажиллаарай. Батлах хамгаалах салбарт, зэвсэгт хүчинд зүтгэсэн албан хаагчдын цолны нэмэгдэл, нийгмийн асуудалд тун анхаарч ажиллах шаардлага бий. Хэдийгээр хууль гарсан ч хэрэгжилт хангалтгүй байгаа шүү. Сүүлийн таван жилийн хугацаанд цэрэгт алба хааж байсан залуус амь нас, эрүүл мэндээрээ хохирсон байна. Энхийн цагт гранат дэлбэрснээс амь нас эрсдэж байна. Мэргэжлийн инженер, бүтээн байгуулалтын цэргүүдийг өргөнөөр ажиллуулаарай. Энэ нь хөдөлмөрийн конвенцийг зөрчихгүй.

А.Сүхбат:

Энэ салбарыг гал алдуулахгүй аваад явчих боломж Н.Энхболдод бий. Цэргийн цаг хугацааны тухайд санал байна. Гурван жилийн цэрэг хүн болоод ирдэг дээ гэж хуучин ярьдаг байсан. Тиймд нэг жилийн цэргийн хугацааг нэмэх, цалинтай цэргийн системд нэвтрүүлэх талаар шинээр харах шаардлага, хэрэгцээ үүсчээ. Зэр зэвсгийн асуудлыг мөн шинэчлэл хийгээрэй. Хуучин цагаан хааны зэвсгээр өнөө үед явахгүй шүү. 

Б.Бат-Эрдэнэ:

Манай батлан хамгаалахын салбарт туршлагатай улстөрч томилогдож байгаад баяртай байна. О.Баасанхүү гишүүний тавьж буй давхар дээлний тухай шүүмжлэлийг ойлгож байгаа. Бид ч сөрөг хүчин байхдаа давхар дээлийг шүүмжилж байсан. Сөрөхийн тулд сөрж байгаагүй. Намын мөрийн хөтөлбөрт ч олон давхар дээлтэй сайдуудыг цөөлөх тухай тусгасан. Тиймд О.Баасанхүү гишүүнтэй санал нэг байна. Батлах хамгаалах салбарын сайд бол давхар дээлтэй байхад харин татгалзах зүйл байхгүй ээ. Учир нь үндсэн чиглэлийн яамны сайд давхар дээлтэй байх нь буруу биш. 

Б.Хурцболд