Тэр үнэнээ л хэлж...

Хэвлэл мэдээллийн хэрэгслээр илт худал мэдээллийг ичих ч үгүй мэдээлж суугаагийн цаана ямар нэгэн захиалга, ашиг сонирхлын зөрчил байгаа нь тодорхой байдаг.  Урьтал болгон үүнийг өгүүлдгийн учир нь Шинэ Засгийн газрын гишүүдийг тойрсон худал мэдээллүүдэд хариу тайлбар өгөхөд оршино. У.Хүрэлсүхийн Засгийн газрыг харлуулж л байвал, хэнийг ч юу гэж худлаа гүтгэхээс буцахгүй "шийдсэн гарууд" байгаа бололтой.

 Тухайлбал, Сангийн сайдаар нэрлэгдээд байгаа Ч.Хүрэлбаатартай холбоотой мэдээллүүд юм. Түүнийг Оюу толгойн гэрээг хийсэн, ЗГХЭГ-ын дарга байхдаа энэ гэрээг УИХ-аар батлаад тендер авсан, Дубайн гэрээг хийсэн, дэмжсэн, Рио Тинтогийн төлөөлөгч мэтээр бичих болжээ. Тэгвэл энэ бүх мэдээлэлд тэрбээр дараах тайлбарыг өгчээ.

 Тус тайлбартаа "

1. 2007 онд миний ахлаж хийсэн ОТ-н гэрээнд ил болон далд уурхайн бүх бүтээн байгуулалтыг 2,7 тэрбум долларт багтааж хийх (одоо 7 тэрбум доллар), зэс хайлуулах үйлдвэрийг 2012 онд ашиглалтанд оруулах, эрчим хүчээ монголоос авах, нийт ажиллагсдын 90%-иас доошгүй нь монголчууд байх, инженер техникийн мэргэжилтэн бэлтгэдэг сургуульд хөрөнгө оруулалт хийж, олон улсын жишигт хүргэх зэрэг монголд хэрэгтэй олон заалтыг оруулж чадсан юм. ХАРАМСАЛТАЙ НЬ ЭНЭ ГЭРЭЭГ ТУХАЙН ҮЕД УИХ БАТЛААГҮЙ ЮМ. “Босоо” Гамбаа ч хэд хэдэн удаа Хүрэлбаатарын энэ гэрээ хамгийн сайн гэрээ байсан юм гэж хэлж байсныг санаж байна.

2. УИХ-ын гишүүн асан Д.Ганхуяг намайг ЗГХЭГ-ын дарга байхдаа ОТ-н гэрээ хийж Арц суварга гэдэг компанид тендер авч өгсөн мэтээр ор үндэсгүй гүтгэж байсан удаатай. Тухайн үед би ТВ-ээр тайлбар, няцаалт өгч байсныг та бүгд санаж байгаа байх аа. ОТ-н гэрээ байгуулагдах үед ЗГХЭГ-ЫН ДАРГААР ДОЛГОР САЙД, БИ ТӨСВИЙН БХ-НЫ ДАРГААР АЖИЛЛАЖ БАЙСНЫГ ДАХИН САНУУЛМААР БАЙНА. ОТ-н гэрээ батлагдсанаас хойно, С.Баяр ажлаа өгч Сү.Батболд Ерөнхий сайд болоход би ЗГХЭГ-н даргаар томилогдож ажилласан. Түүнчлэн тэр Арц суварга гэдэг компанитай холбогдох нь бүү хэл, тийм компани байдаг эсэхийг нь мэдэхгүй байж байгаад гүтгээч нарын амнаас анх удаа сонссон юм. Үгээ хэлэх эрх чөлөөг би байнга хүндэлж ирсэн, цаашид ч хүндэлнэ, гэхдээ гүтгэхэд бас хязгаар байх ёстой доо.

3. 2009 ОНД ОТ-Н ГЭРЭЭГ БАТАЛСАН УИХ-ЫН ЧУУЛГАНД БИ ОРОЛЦОЖ ЧАДААГҮЙ ЮМ. Та бүгд гэрээг хэн хэн дэмжиж, хэн хэн эсрэг санал өгснийг олоод үзчихнэ биз дээ. Тэгэхээр ОТ-н гэрээг батлуулж тендер авсан гэдэгт итгэх хүн хэр олон бол. Дахиад хэлэхэд учир зүггүй гүтгэхээ больчихол яасан юм бэ?

4. Дубайн гэрээ 2015 онд Ч.Сайханбилэг Ерөнхий сайд байхад, манай намыг сөрөг хүчин байхад хийгдсэн гэдгийг дахиад хэлье. Би сөрөг хүчин байхдаа бусдын араар нуугдаж, ашиг хонжоо харж явсангүй. Харин хэлэх үгээ хэлж бурууд хатуу, зөвд зөөлөн явж ирсэн юм.

Би хуйвалдаж, хулгай хийдэг хүн биш ээ. Хэн нэгнийг гүтгэж, нүгэл үйлдэж явсангүй, намайг битгий муулаач, би сайн хүн гэж мөнгө өгч тохиролцож ч явсангүй. Монголын улс төр аливаа шантаажчид, нөхцөл тавьж тохиролцогчид, шахаачдаас хол байх ёстой, ингэж байж улс төр цэвэр болно гэдэгт хатуу итгэж байгаа, ийм болгохын төлөө ажиллаж байгаа" хэмээжээ.

Тэр үнэнээ л хэлж. Бусдыг гүжирдэж, доромжилж, нэр төрд нь эрээ цээргүй ханддаг хүмүүс үүнийг нэгд нэгэнгүй уншаасай. Ч. Хүрэлбаатарын хувийн хийгээд улс төрийн намтар хаа очиж "ЦЭВЭР". Тэр улс төрд нэр алдар, эрх ашгийн төлөө бус эх оронч үзэл, эрдэм мэдлэгээ төрийнхөө төлөө зориулах гэж ирсэн түүхтэй хүн юм билээ.  

Залуухан доктор Ч.Хүрэлбаатар Австралид төгсөөд эх орондоо ирэхэд нь тухайн үеийн Ерөнхий сайдын урилгаар төрийн ажил хийж эхэлсэн гэдэг.

 Ийнхүү 2000 онд Сангийн яамны Төрийн нарийн бичгийн даргаар ажиллаж байсан туршлагыг нь харсан ч төрийн санхүүгийн асуудлыг аваад явчих чадалтай нэгэн юм. Манайхан шиг сайд нарт "Мэргэжлийн" энэ тэр гэсэн шалгуур тавихыг хүсдэг улсад Ч.Хүрэлбаатар харин ч хамгийн нийцэх хүн гэж хэлж болно. Учир мэдэх хүмүүсийн ярьж буйгаар "Монголын цөөхөн хэдэн чадалтай эдийн засагчдын нэг" гэх юм билээ. Дээрх бүхнийг эш үндэс болгоод үзсэн ч У.Хүрэлсүхийн Засгийн газрын сайд нарыг өнгөлөх хүн бол яах аргагүй Ч. Хүрэлбаатар. Түүнийг нь мэдсэн бололтой, энэ Засгийн газрыг харлуулах ажиллагааг зохион байгуулагчид Ч.Хүрэлбаатарыг онилж, Оюутолгой зэрэг олон янзын юманд нэрийг нь холбох гэж үлгэр зохиох болсон нь нэгэнт тодорхой боллоо.

 Гэвч ийм үлгэрт итгэдэг хүүхэд ч байхгүй нь бодит үнэн билээ.

С.Баяр

Эх сурвалж: Zindaa.mn