Д.Хаянхярваа: Ард түмний нэрийг барьж ПОПУЛИЗМ хийхээ зогсоо

УИХ-ын чуулганаар Ерөнхий сайдад нэр дэвшигч У.Хүрэлсүхийг батламжлах асуудлыг хэлэлцэж байна. УИХ-ын гишүүдийн хэлсэн үгнээс хүргэж байна. 

УИХ-ын гишүүн Д.Хаянхярваа:

Сүүлийн үед ард түмний нэрийг барьж, нийгэмд популизм тал руугаа яваад байна. Тиймээс төрийн хүмүүс тоо баримт дээр ярьж сураарай гэж зөвлөх байна. Ард түмэн тэгж үзэж байна гэж ерөнхий юм их ярих болж. Эдийн засгийг тоогоор л илэрхийлдэг.

Монгол Улсад үндэсний томоохон аж ахуйн нэгжүүдээ олон нийтэд таниулах ажил хийгдэхгүй байна. Мафижсан, олигархижсан гэх мэтээр үндэсний том аж ахуйн нэгжүүдээ гутаах доромжлох байдал газар авлаа. Ийм байдлаар хол явахгүй. Харин ч эсрэгээрээ төрийн зүгээс дэмжиж ажиллах ёстой. Талцал хагарлын асуудал руу хувийн хэвшлээ түлхэж, оролцуулж болохгүй.

УИХ-ын гишүүн Б.Баттөмөр:

Монгол Улсын гадаад өр 25.2 тэрбум доллар байна. Энэ бол аюул занал. Зээлжих зэрэглэл дампуурлын өмнөх ангилалд хамрагдаж байгаа. Эдийн засаг нь ганцхан банкин дээр суурилсан. Бүтэц нь зөвхөн уул уурхай. Төсвийн сахилга бат алдагдсанаас ОУВС-аар хичээл заалгаж байгаа. Эдийн засгийн энэ таагүй байдлаас гадна улс төрийн таагүй байдал сүүлийн үед ихэслээ. Улстөржилт савнаасаа хальсан, талцал ихэссэн.

Хөгжлийн эрсдэл их өндөр болчихсон байна.  Яагаад өнөөдөр ийм их эрсдэл үүссэн бэ гэхээр бид сууриа буруу тавьчихсан. Хазгай суурин дээр байшин барьж болохгүй. Тиймээс Үндсэн хуулийн өөрчлөлтөөс эхлэх хэрэгтэй.

Монгол Улсын өнөөгийн явж байгаа хөгжлийн загвар бол хоцрогдсон. Хуримтлал үүсгэж чадахгүй, хуримтлалгүй учраас хөгжил дэвшил байхгүй. Шинэ Засгийн газар хуримтлал бий болгодог загвар бий болгох хэрэгтэй. Монгол шиг хөгжлөө төлөвлөдөггүй улс дэлхийд байхгүй. 

Б.Хурцболд

WWW.ZINDAA.MN