Бүртгэлтэй ажилгүй иргэдийн тоо 6 хувиар нэмэгдэв

Статистикийн газраас  Монгол Улсын нийгэм, эдийн засаг  2016 оны хоёрдугаар сарын байдлаар ямар байгаа талаарх судалгааг гаргажээ. Тус мэдээллээр өнгөрсөн сард 1845 иргэн орон тооны цомхтголд орсон байна. Харин 767 иргэн байгууллага нь татан буугдсаны улмаас болж ажилгүй болжээ. Энэ болоод бусад шалтгааны улмаас бүртгэлтэй ажилгүй иргэдийн тоо жилийн өмнөхөөс 6 хувиар нэмэгдэж, 35.4 мянга болсон байна. Харин хөдөлмөр эрхлэлтийн байгууллагад бүртгэлтэй иргэдээс 4223 иргэн өнгөрсөн сард ажилд зуучлагдан оржээ. Мөн хугацаанд 11.2 мянган иргэн хөдөлмөрийн хэлтэст шинээр бүртгүүлсэн нь ажилд зуучлагдан орсон иргэдээс 2.6 дахин их байгаа юм. Энэ оны эхний 3 сарын байдлаар 29 мянган иргэн хөдөлмөрийн хэлтэс шинээр бүртгүүлсэн байна. 

Харин бүртгэлтэй ажигүй иргэдийн тоо нэгдүгээр сарын эцэст 34.6 мянга байсан тухай тус газраас мэдээлж байсан юм.   

Ажиллах хүчний 2015 оны дөрөвдүгээр улирлын судалгааны дүнгээр улсын хэмжээнд ажиллах хүч буюу 15, түүнээс дээш насны эдийн засгийн идэвхтэй хүн ам 1164.1 мянга болжээ. Үүний 624.6 мянга буюу 53.7 хувь нь эрэгтэй, 539.5 мянга буюу 46.3 хувь нь эмэгтэйчүүд байгаа ажээ.

 А.Чимгээ