Зорчигчийг зодох нь энгийн үйлдэл болжээ ”Нийтийн тээврийнхэн”

Иргэд бид нийтийн тээврээр зорчихдоо жолооч, кондукторуудын ёс бус үйлдлийг өдөр болгон хардаг. Тэгвэл хэрээс хэтэрсэн кондукторын үйлдэл олны дургүйцлийг хүргэж байна. Өөрөөр хэлбэл энэ долоо хоногт автобусны кондуктор зорчигтой зүй бус харьцаж байгаа бичлэг интернэтийн орчинд цацагдсан. Тэгвэл өчигдөр авто тээврийн газраас тус автобусны үйлчилгээ эрхлэгч ДЮЦ компанид Авто тээврийн хуулийн дагуу хариуцлага тооцсон байна. Харин ДЮЦ компани зорчигтой зүй бус харьцсан кондукортоо хариуцлага тооцож, түүнтэй байгуулсан хөдөлмөрийн гэрээгээ цуцалжээ. Гэхдээ энэ мэт харьцааны соёлгүй, хийж байгаа ажлаа ухамсарлаагүй кондуктор, жолоочууд олон байна. Хамгийн энгийн жишээ гэхэд л зорчигчдийг суулгачаад автобусандаа тамхи татах гэх мэт үйлдлийг хийдэг. Тиймээс нийтийн тээврийнхэн эхлээд үйлдлээ засч, үйлчилгээ сайжруулчаад дараа нь цалингаа нэмүүлэх эсэхээ ярилцмаар юм.