Я. Батсуурь, Д.Энхжаргал нарт холбогдох хэргийг шалгаж байна

“Эрдэнэс Тавантолгой” компанийн гүйцэтгэх захирал Я.Батсуурь, Худалдан авах ажиллагааны газрын дарга Д.Энхжаргал нарт холбогдох хэргийн мөрдөн байцаалтын ажиллагаа үргэлжилж буй. Тэдэнд Эрүүгийн хуулийн 263 дугаар зүйл буюу “Төрийн албан тушаалтан албаны эрх мэдэл буюу албан тушаалын байдлаа урвуулах” зүйл ангиар эрүүгийн хэрэг үүсгэн шалгаж байгаа аж. АТГ-аас шалгасан хэргүүдийн дийлэнх хувийг төрийн албан тушаалтан албан эрх мэдэл буюу албан тушаалын байдлаа урвуулан ашиглах гэмт хэрэг эзэлж байна гэж тус газрын Хэвлэл мэдээллийн ажилтан Т.Мөнхтунгалаг онцолжээ. АТГ энэ оны нэгдүгээр улиралд эрүүгийн 101 хэрэгт мөрдөн байцаалтын ажиллагаа явуулжээ. Үүнээс 17 хэрэгт яллах дүгнэлт үйлдүүлэхээр шүүхэд шилжүүлсний дотор “Нүүрс” хөтөлбөртэй холбоотой Л.Гансүх нарт холбогдох хэрэг, Эрүүл мэндийн яамны төрийн нарийн бичгийн дарга асан Н.Түмэндэмбэрэл нарт холбогдох хэрэг багтжээ.