АНУ зарим Элчин сайдын яамаа түр хугацаагаар хаажээ

Ойрхи дорнодод байрлах АНУ-ын Элчин сайдын яам, кон­сулын газрууд хаалгаа барина хэмээн урьдчилан мэдэгдэж бай­сан билээ. Хэлж байсан ёсоороо өнгөрсөн ням гаригт Арабын Нэгд­сэн Эмират улсын Абу-Даби, Иракийн нийслэл Багдад, Еги­петийн Каир хотууд дахь Элчин сайдын яамд хаалгаа барьсан байна. Эдгээр цэгүүд рүү алан хядах бүлэглэл  дайрч магад­гүй гэж таамаглалын дагуу ийм арга хэмжээ авсан юм. Учир нь өн­гөрсөн долоо хоногт АНУ-ын ашиг сонирхолд хор хөнөөл учруу­лах довтолгоон явуулах талаар хоо­рондоо зөвлөлдөж байсан  "Аль-Каидагийн" лидерүүдийн яриаг тусгай албаныхан замаас нь барьж авсан юм байна.

Тэгвэл энэ таамаглал зөрөөгүй болох нь эхнээсээ батлагджээ. Өчигдөр Иракийн зарим дүүргүү­дэд хүчирхийлэл болон халд­лагын улмаас 14 хүн амиа алдсан байна. Нийслэл Багдад хотноо хоёр бөм­бөг дэлбэрч гурван хүн нас барж, арван хүн хүндээр шархадсан байна. Харин урьдчилан арга хэмжээ авсны үндсэн дээр АНУ-ын Элчин сайдын яамдаас хүн бэртэж гэмт­сэн хэрэг гараагүй байна. АНУ-аас эдгээр хотуудад цаашид ч гэсэн халдлага хийх магадлалтай бай­гааг ард ир­гэддээ анхааруулсаар байгаа аж. Төрийн департаментын мэдээгээр довтолгооны бай нь жуулчдын төв түүнчлэн  олон нийтийн тээврийн хэрэгсэл болж магадгүй гэжээ. Өнгөрсөн 2012 онд Ливи дэх Элчин сайдын яаманд халдлага гарч, Элчин сайд Кристофер Сти­венс хэд хэдэн ажилтнуудынхаа хамт амиа алдсан гашуун түүх байгаа билээ.