Найзынхаа төлөө юу ч хамаагүй хийнэ гэж амласан Бооёо хэнд “хайр” зарлав

“Шинэ үе” продакшны захирал, жүжигчин Н.Ариунболд буюу Бооёо цөөхөн найзтай гэдгээрээ бахархдаг. Учир нь, түүний нэрлэснээр шагай шиг сайхан ерөнхий найзууд нь ёстой л нэг үй зайгүй дотно нөхөрлөдөг юм байх. Тэдний нэг нь УДЭТ-ын найруулагч, жүжигчин Н.Наранбаатар бөгөөд мань хоёр дунд сургуульд байхаасаа үерхэж нөхөрлөсөн түүхтэй аж. “Төмөр замын шороог хамт идэж өссөн” гэж ирээд л гайхуулдаг Бооёо театрын тайзан дээр түүхэн жүжгээр өөрийнхөө ур чадварыг харуулж буй найзаараа ихэд бахархдаг гэнэ.

Тиймдээ ч, нэгэн нэвтрүүлэгт оролцох үедээ энэ тухайгаа илэн далангүй яриад “Манай найз таван хүүхэдтэй өнөр өтгөн айлын эзэн, бас сайн найруулагч болохоор нь би дандаа хайрлаж хүндэлж явдаг юм. Ямар ч хүнд хэцүү үед намайг орхиогүй, үргэлж миний дэргэд байсан учраас би түүний төлөө юу ч хийж чадна. Наранбаатар аа, чи бол би. Би бол чи шүү” гэж багын найздаа чанга дуугаар мэнд дэвшүүлжээ. Үүнд найруулагч найз нь ихэд уярч, хошин урлагийн продакшинтай хамтарч уран бүтээл хийхээр төлөвлөж байгаагаа дуулган Бооёо найзтайгаа нэгэн сюрприз зэхэхээ амласан гэнэ.