“Домог”-ийн залуус Болгарын тэмцээнд оролцож, “Сувдан театр”-т тоглолтоо хийнэ

Австрийн Вена хотноо болсон нэрт хөгжмийн зохиолч Ф.Шубертийн нэрэмжит олон улсын хөгжимчдийн наадмыг гурван төрөлд манлайлж, эх орныхоо нэр алдрыг дуурсгаад ирсэн “Домог” хамтлагийнхан Ерөнхий сайд Н.Алтанхуягтай уулзжээ. Хамтлагийн болон гоцлол хөгжмийн төрөлд тэргүүн байр эзэлж, хамтран тоглосон төгөлдөр хуурч Д.Баярцэцэг шилдэг концертмейстрээр шалгарсан юм. “Олон улсын А зэрэглэлийн шалгуур өндөртэй тэмцээнд анх удаа оролцоод ийм өндөр амжилт гаргах нь өөрөө домог болсон үйл явдал” гэж хамтлагийг ахлан явсан МУГЖ Д.Сосорбарам тодотгосон бөгөөд “Алтайн магтаал”, “Түмэн агтны төвөргөөн” бүтээлээ тоглоход шүүгч, үзэгчид алмайран сонсч, бахдан биширч байсныг сонирхуулсан ажээ.

Мөн тус хамтлагийнхан ирэх наймдугаар сарын 22-нд Болгарт болох Үндэсний хөгжмийн дэлхийн аварга шалгаруулах тэмцээнд оролцох, язгуур урлагийн бусад хамтлагтай хамтран есдүгээр сарын 17-нд Бээжингийн “Сувдан театр”-т тоглолт хийх зэргээр олон улсын тавцанд гарах тодорхой төлөвлөгөө, зорилттой ажиллаж байгаа ажээ.