Аймгуудын наадмын тов гарчээ

Дархан-Уул аймгийн баяр наадам хамгийн түрүүнд буюу долдугаар сарын 10, 11-нд болох бол Хөвсгөлчүүд нутгийнхаа “Цаатан” наадмыг 6-8-нд хийгээд, үргэлжлүүлээд 11, 12-нд наадахаар төлөвлөжээ.

Дорноговь аймгийн тухайд Говийн догшин ноён нутагт Данзанравжаагийн мэндэлсний 210 жилийн ойтой хамтатган долдугаар сарын 27, 28-нд наадамлана.

Завхан аймгийнхан долдугаар сарын 26, 27-нд 90 жилийн ой, наадмаа хамт тэмдэглэж, 2222 морин хуурч хуур татах юм байна.

Төв аймгийн наадмын тов тодорхой болоогүй ч уртын дууч, морин хуурч, бүжигчин гээд тус тус 90 уран бүтээлч оролцсон нүсэр арга хэмжээг аймгийнхаа ойд зориулан бэлтгэж байгаа ажээ.

Завханы Тосонцэнгэл, Нөмрөг, Завханмандал сум байгуулагдсаны тэгш ой мөн энэ жил тохиож буй тул ой, наадмаа нэгтгэн, долдугаар сарын 25-нд хийх төлөвтэй байна.

Архангай, тус аймгийн Тариат, Өндөр-Улаан, Хотонт, Ихтамир, Цэнхэр, Цахир сумууд ч ялгаагүй 90 жилийн ойгоо наадамтайгаа хамт хийх юм байна.

Хэнтийнхэн аймаг байгуулагдсаны 90 жилийн ойгоороо долдугаар сарын 27, 28-нд зүүн бүсийн хурдан морины уралдаан зохион байгуулах бол Өвөрхангай аймгийнхан 1500 морь уралдуулж, Гиннесийн номд бүртгүүлэхээр бэлтгэл ажлаа хангаж байгаа аж.

Баянхонгор аймгийн Баянхонгор, Галуут сумын 90, Эрдэнэцогт сум 80 жилийн ойгоо наадамтайгаа хамтатган долдугаар сарын 22-24-нд хийх бол Ховд аймгийн Манхан сум 90 жилийн ойгоо мөн наадамтайгаа хамт долдугаар сарын 15-нд хийхээр болжээ.