Дуучин Б.Энхмэнд, яруу найрагч Н.Баянмөнх нар хүүдээ Б.Эрчисмөрөн нэр хайрлажээ

Нийтийн дууны ертөнцөд Г.Чинболор, Б.Энхмэнд гэсэн хоёр нэр тодоос тод бичигдэж үлдсэн нь лавтай. Хайрын дууны хамтрагчид цомог, DVD, тоглолт, клип гээд л уран бүтээлийг ёстой “бөөндөх” шиг болдог байсны нууц нь яруу найрагч Н.Баянмөнхтэй холбоотой гэлцэх нь бий. Үг аялгуу нь зохицсон гайхалтай сайхан дуунууд зохиож, эхнэрийнхээ продюссерээр ажилладаг байсан найрагч залуу нэлээдгүй амжилтанд хүрсэн.

Харин дуучин бүсгүй хөл хүнд болсноор Н.Баянмөнх гэр бүлийн амьдралдаа анхаарал хандуулж, тэдний уран бүтээлийг хэсэг хугацаанд завсарлуулжээ. Дуучин Г.Чинболор ч бие даасан уран бүтээлээ туурвиж хоёр ч цомог гаргаад амжсан удаатай. Бяцхан охиноо өсгөн урлагийн ертөнцөөс “зайгаа барьсан” Б.Энхмэнд дахин хөл хүнд болж, фэнүүддээ бараг мартагдаж эхэлсэн билээ. Харин тэрбээр өнгөрсөн сарын эхээр нярайлж, яруу найрагч Н.Баянмөнхөд удам залгах нуган үр төрүүлж өгсөн юм.

Хосууд том охиндоо Б.Дөлгөөнтамир гэх содон нэр хайрлаж байсан бол, энэ удаа шинэ хүнийхээ нэрийг Б.Эрчисмөрөн хэмээн сонгосон аж. Сонирхуулахад, яруу найрагч Н.Баянмөнх тавын тоог шүтдэг бөгөөд хүү нь тавдугаар сарын таванд мэндэлж, 15-нд буюу аавынхаа төрсөн өдрөөр гэрчилгээг нь гардаж авсандаа туйлын их бэлэгшээд байгаа гэсэн шүү.