“Камертон-2” хамтлагийнхан 50 саяын гэрээ байгуулж, Төрийн соёрхолтыг “уйлуулав”

Хамтлагийнхаа 15 жилийн ойн баярыг сүр дуулиантайхан тэмдэглэж байсан “Камертон”-чууд төд удалгүй өөрсдийн залгамж халааг бэлтгэх ажилд орсон. Багагүй хугацаанд үргэлжилсэн реалити шоуны дараа “Камертон-2” хамтлаг төрөн гарч, ах нарынхаа хит дуунуудыг сонирхолтой хэлбэрээр амилуулж эхэлсэн билээ. Гэхдээ шинэ, хуучин хамтлагийн гишүүд хоорондоо эв түнжин муутай, мөнгө төгрөгийн асуудал ихтэй хэмээгдэж байсан ч эл яриа худал болох нь нотлогджээ.

“В” продакшин, “Боловсрол” суваг телевизээс хамтран “Камертон-2” хамтлагийг төрүүлсэн учраас Төрийн соёрхолт дуучин Д.Болд авьяаслаг залуусын уран бүтээлийг дэмжих томоохон байгууллагуудын эрэлд гарсан аж. Улмаар сүүлийн хэдэн жил “Камертон”-чуудтай хамтран ажиллаж буй “Скайтел” группээс “Камертон-2” хамтлагийн уран бүтээлийг дэмжиж 50 сая төгрөгийн гэрээ байгуулсан байна. “Хүүхдүүд”-ийнхээ өмнөөс баярласандаа бараг уйлах шахсан Д.Болд хөл нь газарт хүрэхгүй хөөрч яваагаа дуулгажээ.

Дашрамд сонирхуулахад, “Камертон-2” хамтлагийн залуус өнөөдөр Сингапур улсыг зорих бөгөөд тэнд хэлний сургалтад суралцахын сацуу уран бүтээлээ үргэлжлүүлэх гэнэ.