Шинэ төмөр замыг ХААН банкны зээлээр санхүүжүүлж байна

Автор | Zindaa.mn
2011 оны 04 сарын 20

“Төрөөс төмөр замын тээврийн талаар баримтлах бодлого”-ын хүрээнд Даланзадгад-Таван толгой-Сайншанд-Чойбалсангийн чиглэлд шинээр төмөр зам барихаар болсон. Энэ ажлын техникийн даалгаврын дагуу дараах ажлуудыг хийж гүйцэтгэжээ.

  1. Геодезийн судалгааны чиглэлээр 1135 км-т хээрийн судалгааны 10 км-ийн интервалтай үндсэн цэг тэмдэгтүүдийг суулгах, байгуулсан,
  2. Геодезийн компаниуд өндрийн болон байрлал зүйн үндсэн сүлжээг байгуулах хээрийн хэмжилт судалгааны ажлыг хийж, боловсруулалтын ажлыг бүрэн дуусгасан,
  3. Геологи, геотехникийн судалгааны чиглэлээр 1135 км-т трассын дагуу ус зайлуулах хоолой, гүүр болон усны хуримтлалын талбайн байрлалын тодотгол хийх хээрийн судалгааны ажлыг дуусган ус зүйн 1:50000-ны зураглал боловсруулах ажлыг гүйцэтгэж эхэлсэн,
  4. Геологийн хээрийн судалгааг Даланзадгад-Сайншанд-Баруун-Урт-Хөөт-Чойбалсан чиглэлийн трассын дагуу 500 метр тутамд өрөмдлөгийн ажлыг Зүүнбаянгаас баруун тийш 80 км газарт гүйцэтгэсэн зэрэг ажлуудыг хийсэн талаар ЗТБХБ-ын сайд Х.Баттулга өчигдөр гишүүдэд мэдээлэл хийлээ.

Төмөр замын төслийн ажлыг эхлүүлэхэд шаардлагатай хөрөнгийн асуудлыг шийдвэрлээгүй байгаа тул дээрх ажлуудыг “Геомастер” ХХК, “Эко Гидро Гео” ХХК зэрэг компаниудаас мөнгө гаргуулан зээлээр гүйцэтгүүлж байгаа аж. Шинэ төмөр замын трассын дагуух “Байгаль орчинд нөлөөлөх байдлын Ерөнхий үнэлгээний дүгнэлт”-ийг БОАЖЯ-аар хийлгэжээ. Цаашид нарийвчилсан үнэлгээг хийлгэхээр техникийн даалгаврыг боловсруулан ажлыг нь эхлүүлээд байгаа гэнэ.

Замын ажлыг эхлүүлэхэд шаардагдах хөрөнгийн эх үүсвэрийг Хөгжлийн банкаар дамжуулан шийдвэрлэхээр заасан боловч одоогийн байдлаар тус банкнаас санхүүжилт авах боломжгүй байгаа учраас ТӨХ-ноос “МТЗ” ТӨХК-д зээл авах зөвшөөрөл олгосон гэнэ. Уг зөвшөөрлийн дагуу арилжааны банкуудтай ярилцан санал авч, бага хүүтэй боломжит нөхцөл санал болгосон ХААН банкнаас нэг жилийн хугацаа бүхий 9 хувийн хүүтэй зээл авах гэрээ байгуулсан байна.

Д.Билгүүн. Zindaa.mn

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top