Ким Жон Ун: Хүнсний хангамжийн байдал хүнд байна

БНАСАУ-ын удирдагч Ким Жон Ун Солонгосын Хөдөлмөрийн намын Төв хорооны бүгд хурал дээр үг хэлэхдээ хүнсний хангамжийн байдал хүнд байна гэж мэдэгджээ.

“Rodong Sinmun” хэвлэлд мэдээлснээр, өнгөрсөн оны хар салхины хохирлоос үүдэлтэй үр тариа хураалтын төлөвлөгөө тасалдаж, хүнсний хангамжийн асуудал хүндэрчээ. Тиймээс Ким Жон Ун хүнсний асуудлыг шийдэх арга хэмжээ авах чиглэл өгсөн байна.

Тус улсад коронавирусний халдварын тархалтаас урьдчилан сэргийлэх зорилгоор хөл хорионы арга хэмжээг сунгасан нь хүн амыг хувцас, хүнс, орон сууцаар хангах чиглэлээр авч буй арга хэмжээ сунжрахад хүрсэн гэж Ким Жон Ун онцолсон байна.

Энэ оны дөрөвдүгээр сард Пёньян хотноо болсон намын хороодын нарийн бичгийн дарга нарын бага хуралд оролцогчдод хандан Ким Жон Ун ард иргэдийнхээ аж амьдралыг дээшлүүлэхийн тулд “хүнд аянд” гарахад бэлэн байхыг уриалж байжээ. “Хүнд аян” гэж 1990-ээд оны дунд үед БНАСАУ эдийн засгийн ноцтой хямралд орж, олныг хамарсан өлсгөлөнгийн улмаас олон зуун мянган иргэдээ алдаж байсан түүхийн үйл явдлыг нэрлэдэг байна.