СЕХ: У.Хүрэлсүх 67.76 хувь, Д.Энхбат 20.33 хувь, С.Эрдэнэ 5.99 хувийн санал авлаа

Б.Эрхэс | Zindaa.mn
2021 оны 06 сарын 10

Монгол Улсын 2021 оны Ерөнхийлөгчийн сонгуулийн санал хураалт өчигдөр /2021.06.09/ амжилттай болж, өндөрлөлөө. Урьдчилсан байдлаар МАН-аас нэр дэвшигч У.Хүрэлсүх ялалт байгуулсан талаар Сонгуулийн ерөнхий хорооноос өнөөдөр /2021.06.10/ мэдээлэл хийж байна. 

Энэ үеэр Сонгуулийн ерөнхий хорооны дарга П.Дэлгэрнаран "Монгол Улсын Ерөнхийлөгчийн ээлжит сонгууль болж өндөрлөлөө. Хуульд зааснаар автоматжуулсан системээс гадна гар аргаар тооллоо. Бүх хэсгийн хороодод гар болон хяналтын тооллогыг 100 хувь хийж дуусгалаа. Урьдчилсан байдлаар дүн мэдээгээ танилцуулж байна. Улсын хэмжээнд нийт 2,049,379 сонгогч бүртгэгдсэн. Үүнээс түр хассан нь 110 гаруй мянган сонгогч бий. Эндээс 1429 сонгогч эх орондоо ирсэн тул түр хасав гэдгээ сэргээлгэж, саналаа өглөө. Ирцэд бүртгэгдсэн 1,216.246 сонгогч саналаа өглөө. Ирц улсын хэмжээнд 59.35 хувийн ирцтэй явагдлаа" хэмээн онцоллоо.

Түүнчлэн "МАН-аас нэр дэвшсэн У.Хүрэлсүх 823,326 сонгогчийн саналыг авч 67.76 хувийн дэмжлэг авсан байна. АН-аас нэр дэвшсэн С.Эрдэнэ 72,832 сонгогчийн саналыг авч 5,99 хувийн дэмжлэг авсан. ХҮН-аас нэр дэвшсэн Д.Энхбат 246,968 сонгогчийн саналыг авч 20.33 хувийн дэмжлэг авсан байна. Харин 71,937 сонгогч буюу 5.92 хувь нь цагаан сонголтыг хийсэн байна. Энэ удаагийн сонгууль маш хариуцлагатай, идэвхтэй боллоо. Сонгогчид иргэний үүргээ биелүүлж, халдвар хамгаалалтаа сайн хамгаалж, сонгуульдаа идэвхтэй оролцлоо. Сонгуулийн ажиллагаанд 18146 төрийн албан хаагчид ажилласан" гэж ярилаа. 

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Зангараг(202.179.25.239) 2021 оны 06 сарын 11

Хүрэлсүх гэцгээх юм. Тэр чинь аль эртний хуучирсан зурагдсан пянз шүү дээ. Коммуниүмын хэлтэрхий гэдгээ казинодож бас хүн цохиж унагаасан гэмт үйлдлүүдээрээ баталдаг. Боловсрол байхгүй, соёлд суралцаагүй хоосон цэцэрхэлийн дамжаанд суралцдаг тийм л нэг уйтгартай коммунист.

0  |  0
Top