Уул уурхайн салбарын борлуулалт 2.6 их наяд төгрөгөөр буурчээ

Э.Мөнхжин | Zindaa.mn
2020 оны 10 сарын 12

Аж үйлдвэрийн салбарын нийт үйлдвэрлэл  оны эхний есөн  сард 11.1 их наяд төгрөг болж, өмнөх оны мөн үеэс 2.3 их наяд төгрөг буюу 17.2 хувиар буурлаа. Уул уурхай, олборлох аж үйлдвэрийн салбарын үйлдвэрлэл 2.1 их наяд төгрөгөөр буурсан нь голлон нөлөөлжээ. Цахилгаан хий, уур, агааржуулалтын салбарын үйлдвэрлэл 62.4 тэрбум төгрөг буюу  7.9 хувиар өссөн байна.

Харин аж үйлдвэрийн салбарын борлуулсан бүтээгдэхүүн  оны эхний есөн сард урьдчилсан гүйцэтгэлээр 12.7 их наяд төгрөг болж, өмнөх оны мөн үеэс 2.9 их наяд төгрөг буюу 18.4 хувиар буурчээ. Уул уурхай, олборлох аж үйлдвэрийн салбарын борлуулалт 2.6 их наяд төгрөгөөр, боловсруулах аж үйлдвэрийн салбарын борлуулалт 316.1 тэрбум төгрөгөөр тус тус буурсан нь голлон нөлөөлжээ.

Нийт борлуулсан бүтээгдэхүүний 7.1 их наяд төгрөг буюу 56.3 хувийг гадаад зах зээлд борлуулжээ. Гадаад зах зээлд борлуулсан нийт бүтээгдэхүүний 5.9 их наяд төгрөг буюу 83 хувийг уул уурхай, олборлох аж үйлдвэрийн салбарын бүтээгдэхүүн эзэлж байна.

Гадаад зах зээлд борлуулсан уул уурхайн бүтээгдэхүүний 65.5 хувийг металлын хүдэр олборлолтын салбарын бүтээгдэхүүн, 28.3 хувийг нүүрс олборлолтын салбарын бүтээгдэхүүн, 4.1 хувийг газрын тос олборлолтын салбарын бүтээгдэхүүн, 2.2 хувийг бусад ашигт малтмал олборлолтын салбарын бүтээгдэхүүн эзэлж байна гэж Үндэсний статистикийн хорооноос мэдээллээ.

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top