Д.Нямхүү: Таагүй мэдээлэл гарсанд Анх-Отгон их эмзэглэсэн

Коронавируст халдварын нөхцөл байдлын талаар холбогдох байгууллагуудаас өнөөдөр /2020.09.16/ цаг үеийн мэдээлэл өглөө. ХӨСҮТ-ийн ерөнхий захирал Д.Нямхүү хэлэхдээ сүүлийн хоёр өдөрт ХӨСҮТ-ийн лаборатори болон бусад салбар лабораториудад нийт  940 хүнд шинжилгээ хийхэд халдвар илрээгүй гэлээ.

Өнгөрсөн 24 цагийн хугацаанд дэлхийн хэмжээнд 233 мянган хүн шинээр халдвар авч, дөрвөн мянга гаруй хүн эндcэн байна. Өнгөрсөн өдрөөс өвчлөл 34 мянгаар буурч, нас баралт ижил түвшинд байна. Харин 250 мянга гаруй хүн эдгэрчээ.

Мөн тэрбээр Монголд анх удаа коронавирусний халдвар тээсэн хүнээр тодорсон Франц улсын иргэн бидний нэрлэснээр “Анх-Отгон”-ыг коронавирус тусаагүй гэсэн мэдээлэл сошиал орчинд гарсантай холбоотойгоор байр сууриа илэрхийллээ. Анх-Отгонтой утсаар холбогдсон гэлээ. Тэрбээр өөрийн улсдаа шинжилгээ өгөхөд эсрэг бие тогтсон байна, сайн эмчлэгдсэн байна гэсэн хариу өгсөн гэдгийг хэлсэн байна. Анх-Отгон Монгол Улсын Засгийн газар болон, ЭМЯ, ХӨСҮТ-ийн эмч, ажиллагсдад баярлаж талархаж буйгаа дахин илэрхийлсэн. Анх-Отгоны хувьд ийм мэдээлэл гарсанд ихэд эвгүйцэж, сэтгэл зовж хүлээж авсан гэв. Түүнийг эмчилж эдгээсэн эмч мэргэжилтнүүдийн хувьд ч өөрсдийнх нь хөдөлмөр, зүтгэлийг үгүйсгэсэн худал ташаа мэдээлэл цацаж буйд санаа зовинож буй гэж Д.Нямхүү хэллээ.