Ж.Ганбаатар: Онцгой нөхцөлд эдийн засгийн зохицуулалтыг тодорхой тусгах нь зөв

2020 оны 04 сарын 23

"Гурван сарын дотор иргэд байгаа бүх нөөцөө барчихлаа. Дараа нь яах вэ гэдгийг эдийн засгийн талаас нь энэ хуульд илүү тодорхой тусгаж өгөх хэрэгтэй"

Дөрөвдүгээр сарын 23-ны өдрийн УИХ-ын чуулганы нэгдсэн хуралдаанаар 19 хууль, тогтоолын төслийг хэлэлцлээ. Үүний нэг болох Коронавируст халдварын цар тахлаас урьдчилан сэргийлэх, тэмцэх тухай хуулийн төслийг анхны хэлэлцүүлэгт шилжүүллээ. Тус хуулийн төсөлтэй холбоотойгоор УИХ-ын гишүүн Ж.Ганбаатар “Бид хэсэгчилсэн хорио цээрийн дэглэмд ороод гурван сар боллоо. Дэлхийн улсуудыг хараад байхад хэсэгчилсэн хорио цээрийн ажиллагааг нэг сараас хэтрүүлэхгүй байна. Ингэхдээ “Та нэг сар гэртээ бай. Энэ хугацаанд эдийн засгийн ийм ийм боломжуудыг төр шийдэж өгнө” гэж томоохон эдийн засагтай улсууд хэлж байна. Өнөөдрийн энэ хуулийг би дэмжиж байна. Гэхдээ хуульд эдийн засагтай холбоотой асуудлууд бага, тодорхой биш байгааг хэлсэн гишүүдтэй санал нэгдэж байна. Аж ахуйн нэгжийг хаалгаа хааж, иргэдийг гэртээ бай гэж байгааг бүгд ойлгож биелүүлж байна. Гэхдээ гурван сарын дотор иргэд байгаа бүх нөөцөө барчихлаа. Дараа нь яах вэ гэдэг асуудал энэ хуульд ерөнхий байдлаараа орсон бөгөөд хорио цээрийн дэглэм тогтоож байгаа хэцүү үед холбоотой хууль, тогтоомжийн асуудлыг хэлэлцэх нь мэдээж зөв. Гэвч эдийн засгийн асуудлуудаа тодорхой оруулж өгөх боломж байгаагүй юм уу. Уг хуулийн 13.2.2-т Цар тахлаас урьдчилан сэргийлэх, тэмцэхэд шаардлагатай нөөцийг бүрдүүлэх үүрэгтэй гэсэн байна. Энэ үүргийг тодорхой болгож хэлж өгнө үү” гэсэн асуулт тавив.

Асуултад хуулийн төслийг танилцуулсан УИХ-ын гишүүн Ж.Энхбаяр хариуллаа. Тэрбээр “Чухал асуудлыг хөндөж байна. Тархалтыг яавал барих ёстой вэ, дотооддоо яавал алдахгүй байх вэ гэдэгт хуулийн гол агуулга оршино. Ингэхийн тулд төрийн тусгай чиг үүрэг бүхий тангараг өргөсөн байгууллагууд уялдаа холбоотой ажиллаж, эрх зүйн орчинг боловсронгуй болгох нь үндсэн шаардлага болж байна. Бид эхний ээлжид хамгаалалтын арга хэмжээгээ аваад энэ амжилтаа бататгая. Дагасан эдийн засгийн багц асуудлыг шийдэхэд Засгийн газарт төсвийн эрх, Монголбанкинд мөнгөний бодлогын эрхийг нь нээгээд өгчихлөө. Үүнийг цааш үргэлжлүүлэх ёстой” гэж хариулсан юм.

 

Сэтгэгдэл ( 2 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Арай хэт хорьчихлоо(66.181.176.71) 2020 оны 04 сарын 23

Засаг жаахан хэлтгийдүү аваад хөячихлаа Яаж аль болох хэвийн ажил төрөлтэй байлгах вэ гэдэг дээр төвлөрч цаг хожиж ажилласангүй. Хөл хорио ач холбогдлоо өгсөн Үүнтэй зэрэгцээд эмнэлэг тусгаарлалт эм хэрэгсэл эмч сувилагч гээд бүх бусад зүйлээ жинтан болгож гартаа хийж аваад өдөр тутмын ажил амьдралаа хэвийн болгох ёстой байсанюм Одоо халдварыг гараас алдвал урьдах бүхзүйл үр дүнгүй болж хувирна.Гаднаас авах иргэдээ бат тусгаарлах шинжлэх эмчлэх хүчин чадлаа баттай болгоод хүн хүчээ нягт хуваарилаад хатуу зогсчиход бусад ажил амьдрал хэвийн явах байлаа.

0  |  0
зочин(103.229.121.169) 2020 оны 04 сарын 23

Эрх нээж өгөөд ч сан хөмрөгт мөнгө байхгүй болчихвол яах юм. Энэ вирус 1.6 жил болж байж дарагдах тухай яригдаж байдаг. 3 сард бид 5 их наядаа гаргачихлаа.

0  |  0
Top