Монгол Улсын Засгийн газар коронавирусын халдвараас урьдчилан сэргийлэх цогц асуудлаар өнөөдөр /2020.02.26/ хуралдаж, Ерөнхий сайд болон Засгийн газрын хуралдаанаас Орон нутгийн зам, Улаанбаатар руу орох, гарах урсгалыг хязгаарласныг 2020 оны гуравдугаар сарын 3-ныг хүртэл сунгах чиглэлийг Улсын Онцгой комисст өгсөн билээ.

Улсын Онцгой комисс дээрх асуудлаар үргэлжлүүлэн хуралдаж, Засгийн газрын чиглэлийг дэмжлээ. 

Ингэснээр 2020.02.20-ны өдрийн хуралдаанаас гаргасан "Сар шинийн өдрүүдэд буюу хоёрдугаар сарын 23-ны 08.00 цагаас 27-ны 08.00 цаг хүртэл улс, хот хоорондын тээврийг зогсоосон" шийдвэрийг үргэлжлүүлэхээр болж, 2020.03.03-ны 08:00 цаг хүртэл сунгалаа. 

Тодруулбал, улс, хот хоорондын зорчигч тээвэр, суудлын галт тээвэр, хувийн авто машины хөдөлгөөнийг энэ сарын 27-ны 08:00 цагаас гуравдугаар сарын 3-ны өдрийн 08:00 цаг хүртэл хязгаарласан. Түүнчлэн хот дотор үйлчлэх нийтийн тээврийн хөдөлгөөнийг дээрх хугацаанд зогсоож байгаа юм. 

Хөдөлгөөнийг хязгаарласан хугацаанд орон нутгаас ямар ч шалтгаантай байсан иргэдийг хот руу нэвтрүүлэхгүй гэдгийг ОБЕГ-ын дарга Т.Бадрал анхаарууллаа. 

НЭМЭЛТ МЭДЭЭ: 15:30 цагийн байдлаар
 

Нийслэлийн Онцгой комисс Ажил эхлэх, тарах цагт автобусаар үйлчлэх шийдвэр гаргалаа

Онцгой комиссын өглөөний шийдвэрээр Улаанбаатар хот дотор үйлчлэх нийтийн тээврийн хөдөлгөөнийг мөн дээрх хугацаанд зогсоохоор зохицуулсан байсан ч нийслэлийн Онцгой комисс үдээс хойш болсон хуралдаанаараа шийдвэрийг өөрчлөхөөр тогтоод байна.

Тодруулбал, нийслэлийн Онцгой комисс "Нийслэлийн нийтийн тээврийг ажлын өдрүүдэд өглөө, оройдоо буюу ажил эхлэх, тарах үед (маргааш, нөгөөдөр) явуулах нь зүйтэй" гэсэн шийдвэр гаргалаа. 

Ингэснээр, маргааш, нөгөөдөр нийтийн тээвэр өглөө, оройдоо хязгаарлагдмал хэмжээнд үйлчилж,  гуравдугаар сарын 2-нд буюу ирэх долоо хоногийн даваа гарагийн 08:00 цагаас хэвийн журмаар үйл ажиллагаагаа явуулахаар болж байна.  

Хязгаарлалттай өдрүүдэд нийтийн тээвэр 06:00-10:00, 17:00-21:00 цагуудад бүх чиглэлд үйлчлэх ажээ. 

ШУУД ҮЗЭХ