БНСУ-д коронавирусээр халдварласан хүн нас барсан анхны тохиолдол бүртгэгдлээ

Я.Болор | Zindaa.mn
2020 оны 02 сарын 20

БНСУ-д шинэ төрлийн коронавирусээр халдварласны улмаас нас барсан анхны тохиолдол бүртгэгдлээ.

Тус улсын эрүүл мэндийн яамнаас мэдээлснээр, өвчтөн Умард Кёнсан мужийн Чхондо хошууны эмнэлэгт эмчлүүлж байгаад өчигдөр /2020.02.19/ нас баржээ. Эмч нар үхлийн шалтгааныг тогтоохоор ажиллаж байгаа гэнэ.

Ёнхап агентлагийн мэдээллээр, тус улсад коронавирусийн халдвар авсан нийт 104 тохиолдол бүртгэгдээд байгаагаас 16 өвчтөн бүрэн эдгэрч, эмнэлгээс гарчээ. 87 өвчтөн эмчлүүлж байна.

Үүнтэй зэрэгцэн Хятадын эмч нар Хятад улсад ажиллаж, амьдардаг 29 гаднын иргэн коронавирусээр халдварласан тухай өнөөдөр /2020.02.20/ БНХАУ-ын Төрийн зөвлөлийн тамгын газрын орлогч дарга Дин Сяньян мэдээлжээ. Эдгээр иргэдийн талаарх мэдээллийг тухайн улсын элчин сайдын яам, консулын газруудад хүргүүлсэн аж.


СЭРЭМЖЛҮҮЛЭГ 

БНСУ-д ажиллаж, амьдарч буй монголчуудад хандан БНСУ дахь Монгол Улсын Элчин сайдын яамнаас зөвлөмж, сэрэмжлүүлэг гаргалаа. 

БНСУ-д коронавирусын халдвар тохиолдол огцом нэмэгдэж байна. Халдварын тохиолдлууд БНСУ-ын Сөүл, Инчон, Гуанжу, Кёнги мужийн Гуян, Пёнтек, Бүчон, Сувон, Гүри, Умард Чолла мужийн Гүгсан, Өмнөд Чолла мужийн Нажү, Умард Гёнсан мужийн Дэгү зэрэг хотууд болон "Инчён" нисэх буудлаас илэрлээ!!!

Иймээс иргэн та Дэлхийн эрүүл мэндийн байгууллага болон Эрүүл мэндийн яамнаас гаргасан дараах зөвлөмжүүдтэй танилцаж, хэрэгжүүлэхийг уриалж байна.
 

  • Гараа сайтар савандаж, тогтмол угаах
  • Гар халдваргүйжүүлэгч хэрэглэх
  • Хоол хүнсийг бүрэн гүйцэд болгож хэрэглэх
  • Эмнэлэг, олон нийтийн газраар үйлчлүүлэхдээ амны хаалт хэрэглэх
  • Шувуу болон зэрлэг амьтдаас хол байх
  • Ханиалгах, найтаах үедээ ам, хамраа дарж, амны алчуур хэрэглэх
  • Амьсгалын замын өвчний шинж тэмдэгтэй хүмүүсээс зай барих.


Хэрэв таньд өндөр халуурах, ханиалгах, дотор муухайрч огих зэрэг өвчний шинж тэмдэг илэрсэн тохиолдолд БНСУ-ын Халдварт өвчин судлалын төвийн 1339 /24 цагаар ажиллана/, Цагаачлалын албаны 1345 /09.00-22.00 цагийн хооронд монгол хэлээр хариулт өгнө/ тусгай дугааруудад болон ойролцоох эмнэлгийн байгууллагад хандана уу!

БНСУ дахь нөхцөл байдлын талаар тус улсын Халдварт өвчин судлалын төвийн http://ncov.mohw.go.kr цахим хуудаснаас албан ёсны мэдээ, мэдээлэл авах боломжтой.

Мөн өвчний тархалтын нөхцөл байдал болон Монгол Улсын Засгийн газраас авч хэрэгжүүлж байгаа арга хэмжээний талаар ЭСЯ-ны Консулын хэлтсийн 02-798-1950 дугаарын утас, www.mongolembassy.com цахим хуудас болон “Embassy of Mongolia in Seoul” фэйсбүүк хуудаснаас мэдээлэлтэй тогтмол танилцаж байна уу!

Сэтгэгдэл ( 3 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
хаа(23.105.110.226) 2020 оны 02 сарын 21

нийт Монголчуудынхаа эрх ашгын төлөө СОЛОНГОСООС ИРЭХ ХӨДӨЛГӨӨНИЙГ ХААх хэрэгтэй шүү.ЯАРАЛТАЙ.

1  |  0
Зочин (124.80.217.56) 2020 оны 02 сарын 20

2сарын 17 д анхны хүн нас барсан

0  |  0
Зочин(124.80.217.56) 2020 оны 02 сарын 20

2 сарын 17 д анхны хүн нас барсан

0  |  0
Top