Худалдааны дайныг зогсоох алхам хийгдлээ

АНУ-ын Ерөнхийлөгч Доналд Трамп БНХАУ-тай байгуулах худалдааны гэрээний эхний үе шат гэгдэж буй баримт бичигт гарын үсэг зурлаа. Ингэснээр БНХАУ-ын 160 тэрбум ам.долларын үнийн дүн бүхий бараа бүтээгдэхүүнд ногдуулах нэмэлт гаалийн татвараас зайлсхийх боломжтой болж байгаа юм. Нэмэлт татвар энэ сарын 15-нд хүчин төгөлдөр болох ёстой байв.

Блүмберг агентлагийн мэдээлснээр, энэхүү баримт бичгийн хүрээнд Хятад улс АНУ-ын хөдөө аж ахуйн бүтээгдэхүүний импортын хэмжээг нэмэгдүүлэх амлалт өгснөөс гадна талууд өдгөө БНХАУ-ын бараа бүтээгдэхүүнд тавьсан гаалийн татварын хэмжээг бууруулах боломжийг судлахаар тохирчээ.

Худалдааны салбарт тус хоёр улсын хооронд үүсээд буй маргааныг шийдвэрлэх зорилготой гэрээний хүрээнд ихээхэн ач холбогдол бүхий үе шатанд Вашингтон, Бээжин хоёр тулж ирээд байна гэж Доналд Трамп өнгөрсөн аравдугаар сарын 11-нд мэдэгдэж байсан бол мөн сарын 15-ны өдөр тэрбээр Чили улсад болох Ази, Номхон далай бүс нутгийн эдийн засгийн хамтын ажиллагааны байгууллагын /АПЕК/ дээд хэмжээний уулзалтын хүрээнд БНХАУ-ын дарга Ши Жиньпинтэй уулзахаас нааш хэлэлцээр байгуулагдахгүй байх хэмээн тайлбарлаж байжээ. Гэвч АПЕК-ийн дээд хэмжээний уулзалт цуцлагдсан бөгөөд АНУ, БНХАУ-ын төрийн тэргүүн нарын уулзалтын шинэ тов зарлагдаагүй байгаа юм.