Европын сэргээн босголт хөгжлийн банк Монголын алтны төсөлд зээл олголоо

Европын сэргээн босголт, хөгжлийн банкны Удирдах зөвлөлийн шийдвэрээр Баянхонгор аймагт “Хөндий” алтны төсөл хэрэгжүүлж буй “Erdene Resource Development” компанид хөнгөлөлттэй нөхцөлөөр таван сая ам.долларын зээл олгохоор боллоо. “Erdene Resource Development” компани өнгөрсөн жил Монголын хөрөнгийн биржид бүртгүүлснээр Торонто болон Монголын хөрөнгийн биржид давхар бүртгэлтэй Монгол Улсын анхны компани болсон юм.

“Хөндий” алтны төслийн судалгаа яг одоо үргэлжилж байгаа бөгөөд ашиглалтын өмнөх судалгааны ажил2020 оны сүүлээр дуусаж үйл ажиллагаагаа 2021 онд олборлолт эхлэх төлөвтэй байгаа билээ.

Европын сэргээн босголт, хөгжлийн банк Монгол Улсад хөнгөлөлттэй нөхцөлөөр хувийн компани, жижиг, дунд бизнес эрхлэгчдийг дэмжиж ирсэн бөгөөд 2006 оноос хойш нийт 104 төсөлд 1.7 тэрбум еврогийн хөнгөлөлттэй зээл олгоод байгаа ажээ.