Үлэг гүрвэлийн музейг Байгалийн түүхийн музейтэй нэгтгэнэ

Үлэг гүрвэлийн музейд “Эрт төрмөлийн эрин” танхим өчигдөр /2019.07.31/ нээлтээ хийлээ.

Тус танхимыг тохижуулах ажлыг зургаан сарын турш хийсэн ба 40 гаруй сая төгрөгөөр бүтжээ. “Эрт төрмөлийн эрин” танхимд геологийн хөгжлийн эрин, галавуудад амьдарч байсан эртний амьтан, ургамал, тэдгээрийн үүсэл, хөгжлийг харуулсан баримал, зураг, чулуужсан олдворуудыг дэлгэн үзүүлсэн байв.

Гэвч Үлэг гүрвэлийн музейг өнөөдрөөс эхлэн татан буулгах тухай тогтоол 2019 оны долоодугаар сарын 3-нд гарчээ. Учир нь Үлэг гүрвэлийн төв музейг Байгалийн түүхийн музейтэй нэгтгэхээр болсон байна.

Энэ талаар Үлэг гүрвэлийн төв музейн захирал Н. Жавзмаа,“Өнөөдөр нээж байгаа танхим Үлэг гүрвэлийн музейн тав дахь танхим. Бид 2020 гэхэд дахин гурван танхимыг нээж, ашиглалтад оруулахаар төлөвлөсөн байсан. Харин үлэг гүрвэлийн музейг татан буулгах тогтоол долоодугаар сарын 3-нд гарсан юм байна. Гэтэл долоодугаар сарын 30-нд Боловсрол, соёл, шинжлэх ухаан, спортын яамнаас надад тогтоолын талаар танилцуулсан. Өнөөдрийн хувьд тус тогтоолтой холбоотойгоор музейн бүтцийн асуудал яригдаж байгаа гэж бодож байна. Засгийн газрын тогтоолтой холбоотойгоор чухам ямар ажил хийгдэх талаар мэдээлэл надад одоогоор алга. Тиймээс дэлгэрэнгүй мэдээлэл өгөх боломжгүй байна” гэв.

Үлэг гүрвэлийн музей 2013 оноос хойш хагас тэрбум төгрөгийг улсын төсөвт төвлөрүүлжээ. Өнгөрсөн гурван долоо хоногийн хугацаанд гэхэд 20 сая төгрөгийн орлоготой ажилласан ба өдөрт 250-300 хүүхэд, 100 гаруй жуулчин зорин ирдэг талаар музейнхэн ярилаа.