ТҮЦ-ээр хүнсний зарим бүтээгдэхүүн худалдахыг хориглоно

Нийслэлийн мэргэжлийн хяналтын газар /НМХГ/-аас Түргэн үйлчилгээний цэг /ТҮЦ/-үүдээс кимбаб, пирожки, ороомог, сэндвич зэрэг бүтээгдэхүүн худалдан авч идэхгүй байхыг анхааруулж байна. Учир нь өнгөрсөн амралтын өдөр /2019.07.18/ Халдварт өвчин судлалын үндэсний төв /ХӨСҮТ/-д ТҮЦ-т худалдаж байсан хаяг, шошгогүй хиам, өндөгтэй хавчуургатай талх худалдан авч хэрэглэсэн 22 иргэн хоолны хордлого гэсэн оноштойгоор хүргэгдэн ирж, заримынх нь биеийн байдал муудсан юм. 

ТҮЦ-т өндөг, хиамтай талх борлуулж, түүнээс нь иргэд хордсон энэ асуудалтай холбоотойгоор НМХГ-аас наймдугаар сарын 15-ны өдрөөс эхлэн ТҮЦ-т хүнсний бүтээгдэхүүн худалдахыг хориглохоор шийдвэрлээд байна. 

Хэрэв хориглосон хүнсний бүтээгдэхүүн худалдвал холбогдох журмын дагуу хураан авч, устгахыг хатуу анхааруулж байна. Иймд ТҮЦ-ийн үйлчилгээ эрхлэгчид хүнсний бүтээгдэхүүнээ нэмж баяжуулахгүй байхыг Нийслэлийн мэргэжлийн хяналтын газраас санууллаа.