Төв цэвэрлэх байгууламжийн барилгын ажил ЭХЛЭЭГҮЙ байна

Гурван сарын өмнө шав тавьсан нийслэлийн Төв цэвэрлэх байгууламжийн барилгын ажил эхлээгүй байгааг БХБЯ-ны Төрийн нарийн бичгийн дарга С.Магнайсүрэн хэллээ. Тэрбээр “Төв цэвэрлэх байгууламжийн ажил нь түлхүүр гардуулах нөхцөлтэй гэрээ учраас зургийн ажил гэж маш том ажил дуусах шатандаа явж байна. Одоогоор бид долдугаар сарын эхээр барилгын ажлыг эхлүүлэхээр бэлтгэлээ хангаж байна. Санхүүжилтийн хэлэлцүүрүүдээ дуусгаад байгаа. Газар шорооны ажил эхлээгүй боловч зургийн ажил явж байгаа. Ажил ойрын хугацаанд эхэлнэ” гэсэн юм.

Төв цэвэрлэх байгууламжийг гүйцэтгэгч тал 35 сарын хугацаанд барилгын ажлыг гүйцэтгэн хүлээлгэж өгөх гэрээтэй ба долдугаар сард ажил эхэлснээс хойш хугацаа тоологдох аж.

Хэдийгээр барилгын ажил эхлээгүй ч яамны зүгээс “Төв цэвэрлэх байгууламжийн лагийг цэвэрлэж, үнэргүйжүүлэх” арга хэмжээг 2018 оноос хэрэгжүүлж  эхэлсний үр дүнд хоногт  2500 м3 лаг усгүйжүүлэх  байгууламжийг шинээр  барьж  долоодугаар сард ашиглалтад оруулахаар төлөвлөн ажиллаж байгаа юм байна. Мөн хуримтлагдсан хур лагийг халдваргүйжүүлэх, дүүрсэн лагийн картуудыг үнэргүйжүүлэх, суллах, лагийг бордоо болгох ажлыг хэрэгжүүлж байна гэж мэдээллэв.

• Лагийн үнэрийг дарж бактери ашиглан бордоо үйлдвэрлэх ажлыг “Эко Тайхи” ХХК гүйцэтгэж, өдөр тутам гарч буй 1200 м3  (153 өдрийн турш гарсан 183600 м3) хүртэл хэмжээтэй түүхий лагийн үнэрийг дарах, цаашид бордоо болгох, хур лагийн 10 га талбайн 241164 м3 лагийг бордоо болгох, картын талбайд байгаа 294483 м3 лагийг бордоо болгож картыг суллах ажлуудыг хийж байгаа аж. 

• Лагийн үнэр дарах, биологийн бүтээгдэхүүн ашиглан хар шороон хөрс бий болгох ажлыг “Ховд тул” ХХК-тай гэрээ байгуулан ажиллаж байна. ОХУ-д үйлдвэрлэсэн биологийн бүтээгдэхүүнийг Монгол эрдэмтний аргачлалаар 13220 м2 лагийг компостын аргаар хар шороон хөрс гарган авах ажлыг хэрэгжүүлж ажлын явц 90 орчим хувьтай явагдаж байна гэсэн мэдээлэл өглөө.
• Лаг усгүйжүүлэх байгууламжийг барих ажлыг “Ай Вай И Зэт групп” ХХК гүйцэтгэж  буй бөгөөд энэхүү байгууламж нь хоногт 1000 м3 идэвхит лаг, 1500 м3 түүхий лагийг усгүйжүүлэх хүчин чадалтай. Тус байгууламж ашиглалтад орсноор Төв цэвэрлэх байгууламжид өдөр тутам гардаг түүхий лагийг ил задгай хатаадаг байсныг зогсоож, усгүйжүүлэн лагийн хэмжээг 5 дахин бууруулах ба үнэрийг багасгана. Ажлын гүйцэтгэл 80 гаруй хувьтай явагдаж байгаа аж.

Төслийн гүйцэтгэгчээр “Чайна тисижу сивил инженеринг групп” ба Бээжин констракшн  инженеринг групп” консорциум ажиллаж байгаа бөгөөд үндсэн барилга, байгууламжуудыг 35.5 сарын дотор барьж дуусгахаар төлөвлөөд буй. Шинэ Цэвэрлэх байгууламж нь биопрудын зориулалтаар ашиглагдаж байсан 40 га талбайд баригдах бөгөөд нийт талбайн 24.7 га талбай буюу 61 хувьд нь төслийг хэрэгжүүлэхэд шаардлагатай барилга байгууламжийг барьж байгуулна. Мөн шаардлагатай авто зам, явган хүний зам талбай, ногоон байгууламжийг давхар шийдэж өгөх юм. ТЭЗҮ-д тусгагдсанаар хоногт 250,000 м3 бохир усыг цэвэрлэх хүчин чадалтай бөгөөд 3 үе шаттай цэвэрлэгээ, халдваргүйжүүлэлт хийгдэнэ. Лаг боловсруулан биохий гарган авах замаар эрчим хүч болон дулаан үйлдвэрлэж, үйлдвэрийн нийт цахилгааны хэрэгцээний 53 хувийг хангахаар тооцжээ.