АТГ: Эрүүл мэндийн яамны мэргэжилтнүүдийг цагдан хорилоо

Авлигатай тэмцэх газрын Мөрдөн шалгах хэлтсээс зарим албан тушаалтнуудад холбогдох эрүүгийн хэргийн мөрдөн шалгах ажиллагааг дуусгаж, шүүхэд шилжүүлэх саналтайгаар прокурорт шилжүүллээ. 

Тухайлбал, Эрүүл мэндийн яамны өндөр албан тушаалтнаар 2016-2017 онд ажиллаж байсан О нь ажил гүйцэтгүүлсэн нэр бүхий хуулийн этгээдүүдтэй хувийн харилцаа үүсгэж, өөртөө болон бусдад давуу байдал бий болгосон гэх эрүүгийн хэргийг энэ оны тавдугаар сарын 9-ний өдөр шүүхэд шилжүүлэх саналтайгаар прокурорт шилжүүлжээ.

Түүнчлэн мөн яамны мэргэжилтнүүдийг Авлигатай тэмцэх газраас цагдан хорьсон байна. Тодруулбал, өнгөрөгч лхагва гаригт буюу тавдугаар сарын 15-ны өдөр Авлигатай тэмцэх газрын байцаагчид Эрүүл мэндийн яамны мэргэжилтэн Б, Ч нарыг эмийн сангийн тусгай зөвшөөрөл олгохдоо их хэмжээний авлига авсан гэх үндэслэлээр ШШГЕГ-ын харьяа Урьдчилан хорих 461 дүгээр ангид саатуулжээ.