“Шуурхай” телевизээ чамласан дуучин Т.Баясгалан “Одон” телевизийн захирал болох нь

Төрсөн өдрийнхөө бэлгэнд нөхрөөсөө телевиз авдаг “уламжлал” тогтоосон гавьяат жүжигчин, дуучин Т.Баясгаланд атаархах хүн олон. Гэр бүлийн амьдрал зохиосноосоо хойш уран бүтээлээ завсарлаж, чинээлэг хатагтайн тансаг хэрэглээгээр олныг гайхуулж яваа тэрбээр урьд нь “Эх орон”, “Шонхор” зэрэг телевизийг бэлгэнд баян нөхрөөсөө авч байсан билээ.

Гэсэн хэдий ч, эдгээр телевизийнхээ үйл ажиллагааг тууштай явуулж чадалгүй бусдад худалдсан бөгөөд кино урлагт хүч сориод авсан удаатай. Харамсалтай нь, дуучин бүсгүйн продюссерлэсэн “Рашаантын 18” киног нь эс тооцвол, үзэгчдийн сэтгэлд нийцсэн “Помогите нам” киноны гуравдугаар ангийг хийх эрхийг өндөр үнээр худалдаж аваад нөхрийнхөө сонгуульд ашигласан хэрэгт унаж байлаа. Үнэндээ тус киноны гуравдугаар ангийг үзсэн хүмүүс одоо хэр нь голдог юм билээ.

Тиймээс телевизийнхээ ажлыг эргэн санагалзсан Т.Баясгалан энэ жилийн төрсөн өдрийнхөө баяраар “Шуурхай” телевизийг бэлгэнд авсан аж. Тэр ч байтугай, ӨвөрМонголын “Одон” телевизийн Монгол дахь сувгийг нээхээр болсон гэнэ. Эрхэм гавьяат маань уг телевизийн ерөнхий захирлаар ажиллах бол, гүйцэтгэх захирлаар нь найруулагч Го.Бадарч ажиллахаар болжээ. Ийнхүү Т.Баясгалан дөрвөн ч телевизийн захирлын албыг хашиж үзсэн нэгэн болох нь ээ.